ГӀалгӀайчен Кулгалхочо чурча политикан урхаллен керда кулгалхо хьожаваьв
ГӀалгӀайчен Кулгалхочо Келаматанаькъан Махьмуд-Ӏаьлас амара кулг яздир, ГӀалгӀайчен Кулгалхочун администраце, паччахьалкхен чурча политикан урхаллен кулгалхо Мархенаькъан ЗахӀира Анзор хьожавеш, хоам бир «Сердало» газетага ГӀалгӀайчен Кулгалхочун, паччахьалкхен зарбан болх лелабераша.
Цул хьалха Мархенаькъан Анзор хиннав; ГӀалгӀай Республикан администрацен, паччахьалкхен кулгалхочун заместитель волаш.
Из профессиональни балха даькъ тӀа къахьега волавелар ГӀалгӀай паччахьалкхен университет яьккха ваьннача 2010 шера, «Паччахьалкхен доал деча даькъ тӀара ахчанца дувзаденна дешаш» Ӏомадеш хиннав из. Юххьанца «Кострома Рус» ООО болх баьб цо, пхе шера консультанта болх беш дӀаволавенна из кулгалхочун заместителга кхаьчар.
Цул тӀехьагӀа, 2016 шера Мархенаькъан Анзорах «РСМ-Недвижимость» ООО йохкара отдела кулгалхо хул, ший бизнес дӀайолаяле хьалха. Паччахьалкхен балха тӀа Мархенаькъан Анзор воагӀа 2019 шера, цкъа хьалхагӀа декхараш кхоачашдеш хул, цул тӀехьагӀа ГӀалгӀай Республикан кагирхой гӀулакхех йолча комитета кулгалхо хул.
Цига кхаь шера болх баьчул тӀехьагӀа, из хьожаву ГӀалгӀай Республикан Кулгалхочун администраце, паччахьалкхен кердача дарже, цох хул кулгалхочун заместитель, цул тӀехьагӀа кулгалхочун хьалхара заместитель.
Мархенаькъан Анзор «ЦаӀ йола Росси» яхача парте доакъашхо ва, цунга шозза Российски Федераце Президента баркал оалаш дола каьхаташ дайтад, 2020 шера аьтинга бетта 22-ча дийнахьа, иштта 2021 шера оагӀой бетта 6-ча дийнахьа.
