Палестиний-жугтий хатарах дола дош хьоахадир цига Паччахьалкхен Дума депутата БӀарахой Бек-хана. «Кхерам болаш дий-хьогӀ из ерригача Юхерча Малхбоален чугIолла дӀа-юха даржар, малагӀа кхерам ба цунах Россена, мишта гу из дош МИДа?»,-аьлар БӀарахой Бек-хана, доазол арахьарча политикан викалга ше хаттар луш. Рябков Сергейс жоп делар, из хатар дӀа-юха даржар кхерам ба, аьнна. «Вайна гуш дола, жугтий деза герзаш а авиаци а юкъеяккхаро, Ливане а юхе дадача мехкашка из чудетташ хиларо сагодайт», - аьлар Россе МИДа викало.- ХӀаьта вай дика кхетадеш да, хьалха жугтий эскаро палестиний лаьттанна беш хиннача низал чӀоагӀагӀа ба хIанз беш бар. Оаха белгалду, хӀанз укх сахьате Иран чӀоагӀа сабаре хилар. Из а гаьнадаргдий ховш дац, хӀана аьлча Жугтий мехко ХАМАСА тIабихьа Ӏац тӀема низ, из кхыча шиитски герзашца дизача низашка кхоачш ба, хӀаьта уж Тегерана чудоагӀаш да. Дуккха хIама тийша да Персидски залива паччахьех, уж тахан цхьатарра уйла йолаш бац латтача хьалах - Саудовски Арави дукхагӀа озабезам беш я палестиний оагIонгахьа, ВӀашагӀтехача Ӏарбий Эмираташка из кӀезигагӀа хоалуш да. Катар (Турци а - белгалду аз) тешшаме раьза я палестиний оагIув хьаллаца!» Фракцена чуйоагӀача Шхагошев Адальбе тоабан заседане иштта дийцар Нагорни Карабахе латташ дола хьал, доттагIал долча мехкашкара визаш юхаяхар, иштта ядерни герзаш тохкама гIулакха лелхийташ хилар дехкаш дола Договор чIоагIдар юхадаккхарца ювзаенна законопроект кийчъяр.