Мехкада: Даьй турпалал да Беларуссии ГӀалгӀайчеи хеттараш
Россеи Беларуссеи шоай цхьанкхетар дездеча дийнахьа, мехкадас Келаматанаькъан Махьмуд-Ӏаьлас мехка бахархошка къамаьл дир. Республикан кулгалхочо белгалдир, 1996-ча шера бӀаьстан шоллагӀча бетта 2-ча дийнахьа шин мехка юкъера бувзам чӀоагӀбеча каьхата кулг яздаьлга.
«Бувзам лелабеча шерашка дикка чӀоагӀделар шин мехка юкъера хӀама йохкара- эцара, экономикан, Ӏилман-технически, вахара-культурни гӀулакхаш», - аьлар Мехкадас. Белгалде деза, 2022-ча шера юртбоахама оагӀонца, туризмаца, иштта кхыдарашца дувзаденнараш хьаллоацаш ГӀалгӀайчен, Беларуссен юкъе бартчӀоагӀам баьлга.
«Беларусси боккха аьттув болаш мохк ба, юкъера барт, гӀулакхаш дикка доаржадеш дола наькъаш хьаделларгда цар», - теркалдир Мехкадас. Иштта мехка кулгалхочо теркаме лаьцар, Сийлахь-боккхача Даьймехка тӀем тӀа Брестски крепость лораеш лаьттача даьй турпалал ши мохк вӀашкаозаш хилар. Келаматанаькъан Махьмуд-Ӏаьлас белгалдечох, шинна мехка беркате хургйола проекташ йоаржаеш, къахьегаргда республикаша дӀахойодача хана.
