Мехкадас Iалама министерствон кулгалхочунца дийцар, бокъонах йоаца нувхаш дIакхувса моттигаш соцаярах
ГIалгIай мехка бокъо йоацача моттигашка нувхаш дIакхувсаш хиларца дувзаденна гIулакх тоалуш доагIа. Карарча шера цу тайпара 90 моттиг гучаяьлар. Из дош ГIалгIайчен Кулгалхочо цкъа дийца а Iийнадац паччахьалкхен кхетаче йолаш, яхаш, дийцар Мехкадаь зарбан болх лелабераша «Сердало» газетага.
Керда моттигаш хьакхоллаш а нийслу, цига дикагIа терко тIайохийташ болх дIабахьа беза бахархошца. ДукхагIа укхаза теркам бе безараш ба доал деча даькъ тIара кулгалхой: цу тайпара моттигаш хьа а лохаш, уж дIаяхар царна хьалхашка латтача декхарех да.
«Белгалдаккха дезаш да, укх шера из гIулакх дика кхоачашдир Буро кIалхарча, Инаркъерча юртий администрацеша, цар дIаяьхар шиннахьа цу тайпара хьайоаржаяь хинна кхалажаш, иштта Магас шахьаре а, цу тайпарча 10 моттигах 9 моттиг цIенйир.
Цхьайолча моттигий кулгалхошта духьала административни бехк бир Наьсарен- Шахьара прокуратуро. Цу балхах хьахинна толамаш а гуш да. Доал деча даькъ тIарча кулгалхоша а цу гIулакха теркам тIабахийта беза, аз царгара ма хулла чIоагIагIа хьадехаргда цу даькъ тIа толамаш дахар», - аьлар Келаматанаькъан Махьмуд-Iаьлас.
Мехка Кулгалхочо иштта белгалдир, лоархIамеча даькъ тIа доахаш дола толамаш совцаде хьашт доацилга. Моттигерча Iалама тароний министро, шийна тIачIоагIдаьча даькъ тIа дIа-юха а водаш, тIахьожам лоаттабе беза; бехктокхаме болчаргара гучадаьнна кхоачамбоацараш юстардахара терко еш хила веза.
