ГӀалгӀайчен Кулгалхочо баркал аьлар хоржамхошта, кхадж дика тассарах
ГӀалгӀайчен кулгалхочо Келаматанаькъан Махьмуд-Ӏаьлас мехка бахархошта баркал аьлар, Россе президент хоржаш дика кхадж тассарах, цо белгалдир республикан бахархоша дикача вахара тӀехьа цу деношка хоржам баь хилар, яхаш, дийцар «Сердало» газетага ГӀалгӀай Республикан Кулгалхочун, Паччахьалкхен зарбан болх лелабераша.
«Шух хӀаранена баркал ала лов сона, иштта аз баркал оал укх деношка хоржамий даькъ тӀа къахьегаш хиннарашта. Мехка керттера политически моттиг - Российски Федераце хоржамаш- ГӀалгӀайче дика дӀайихьар, хьинаре, кхоачамбоацараш юкъе доацаш», - яздаьд ший телеграм-канале Келаматанаькъан Махьмуд-Ӏаьлас.
ГӀалгӀайче Президента хоржамаш дикача боараме дӀадихьар, нах дукха а бар. Республикан кулгалхоша, министрий кабинета, хоржамий комиссе, доал деча доакъош тӀарча кулгалхоша, хӀармо, волонтёраша дика новкъостал дир цу исторически лоархӀам болча хоржамий денош дӀахьош.
