Мехкадаь кхетаче хилар, ГӀалгӀайче гӀолла йолча Росреестра кулгалхочунца
ГӀалгӀайчен кулгалхочун Келаматанаькъан Махьмуд-Ӏаьлий кхетаче хилар, республике гӀолла йолча паччахьалкхен регистрацен, кадастра, картографе федеральни гIулакха кулгалхочунца Борисов Андрейца, из цу дарже оттаваьчул тӀехьагӀа, яхаш, хоам бу «Сердало» газетага ГӀалгӀайчен кулгалхочун, паччахьалкхен зарбан болх лелабераша.
«Болх бехктокхаме ба. Цу даькъ тӀа балха говзал а я хьа, цудухьа са безам бар хьо дикка балхах кхеташ хилар. Хьо юрист хиларах, хьона юридически оагӀорахьара хьал дика довз, аьнна, хетт сона», - аьлар йоах мехкадас, из хоам бу зарбан болх лелабераша.
Борисов Андрейс белгалдир, ше балха тӀа волча дукха йоацача хана, керттера хаттараш белгалдаьхад ше, паччахьалкхен лаьттанна тӀахьожам лоаттабара, бокъонах доацаш уж дӀалувцара даькъ тӀа цхьацца бола болх дӀахьош а ба, аьнна.
ГӀалгӀайчен Кулгалхочо кердача хьакима тӀадиллар паччахьалкхен лаьтташта хьалхарча аргӀагIа йоагӀаш йола терко яр, хьалхашка этта хаттар кхоачашдар.
Кхетаче йистейоалаш, Келаматанаькъан Махьмуд-Ӏаьлас болх даькъалабийцар Борисов Андрея, дикал йолаш беча балха толамаш дахар эггара лоархӀамегӀа долга белгал а деш.
