Лоамашкарча Даьлатӏе яхача моттигага хьожаш хилар кхелахой
Вай лоамашкарча Даьлатӏе яхача моттиге баха, цига болх дӏахьош хилар кхелахой. ӏалама гӏулакхех йолча Президентски ганзо хьаллоацаш, «Кхаь оагӏон бувзам: ООПТ - ӏилма - Волонтёраш» яхача проектага гӏолла боаржабаь болх бар из. Цу юкъе дакъа лаца эттар гӏо деш бараш,тайп-тайпарча моттигий болхлой, иштта кхыбараш.
«Хоам беш дола улгаш оттадергдола моттигаш къоастайир арабаьннараша, иштта цу доазон наькъаш, кӏалхарча кӏийлен хьал тохкаш къахьийгар. Из деррига накъадаргда цу моттига наькъаш белгалдеш дӏахьоргболча балхаца», - дийцар «Сердалога» мехкарча кагирхой гӏулакхех йолча Комитете.
Белгалде деза, из болх лоархӏамечарех болга. Туристически наькъий хьал боаггӏача боараме довзийташ дола гӏулакх да ала деза цох, цул совгӏа, цу моттиге баха лаьрхӏарашта ховш хургда малагӏча доазон тӏа кхаьчача наькъа хьал хувцалуш, лоравала везаш да.
Ӏалама, экологически оагӏонашца геттара лоархӏаме болх ба ала деза цох. Туристий, иштта тохкама болх дӏахьочар кхерамзлен хьал лорадара тӏехьа эшаш да из деррига.
