РФ Паччахьалкхен Думан депутат БIарахой Iаддалхьамида Бек-хан ваьв 1973-ча шера маьцхали бетта цхьоалагIча дийнахьа, Наьсарен шахьара барт болча дезале. Уж ва бархI дезалхо: 4 йиIиг,4 кIаьнк. Цун да Наьсарен райпо болх беш хиннав, хIаьта нана ший мел бола низ, хьинар бераш кхедара дIалуш яьхай. Боккха дезал къаьстта берашта хьаькъал далара йола «академи» я, цо новкъостал ду царех хIаранена дIахо вахара никъ харжа, из нийса дIабахьа.

Халкъа харжархо тахан ше а ва дукхача дезала да. Из дика тарлуш хул зIамигача берашца, республикан тайп-тайпарча миIингашка дахача царна новкъостал лоаттаду цо.

Бек-хан этта ваьнна дика политик хиларал совгIа, хьинар долаш, ше хьадеча хIаман тIа овсарле йолаш, наьха хьашташ довзаш, царца халонаш екъа кийча волаш саг ва. Из эггара чIоагIагIа сага эшар да, тахан даьд алар духьа дукха даьсса гIулакхаш вайна юкъедаьнна хиларга диллача хIаьта а.

Наха цо деш дола дег чура гIулакхаш гу, из ший нах а мохк а безаш волга бIаргагуш хиларах оал: «Тха депутат БIарахой Бек-хан ше лаьрхIачунга кхачара тIакхувш вола саг ва», — цудухьа цун балха лакха мах оттабу цар.

Тахан Бек-хан, ГIалгIай Республикан кулгалхочо Келаматанаькъан Махьмуд-Iаьлас дIахьош бола никъ хьаллоацаш, цунна уллув латтарех ва, тешам болаш, ше дIатIаийца гIулакх чакхдоаккхаш, дукха кхетаченаш дIахьош, тайп-тайпарча наха новкъостал деш, хьавоагIарех ва. Цо доккхача новкъосталца хьаллаьцаб лаьрххIа йола тIема операци дIахьош бола вай бIухой. Иштта дукха новкъостал даьд таро йоацача дезалашта, кхы дуккхадараш а да цу юкъе.

Паччахьалкхен Думан депутата, коррупцеца къовсам лоаттабара йолча комитета доакъашхочун БIарахой Бек-хана бIаьха вахара никъ ба, говзал а я: Наьсарен ишкол, лакхара дешар, маькх еча заводера болх, паччахьалкхен, юкъарлон моттигашкара болх, мехка Паччахьалкхен Думера къахьегам, предпринимательство.

Цунна, депутат хилале а, довзаш дар экономикан, вахара политкан хьал.

Цкъа ше интервью луш, цо къаьгга белгалдир шийна керттера хетар: «Дезалера лоархIам бараш, сийдола вахар. Из иштта хилара кхоачашде деза вахара-экономикан дешаш.

Вайцига инвестораш хьабоагIаргбола хьалаш хьаде деза, царга зIамига, юкъера бизнес дIайолаяйта еза. Сай республиканна ма хулла дукхагIа пайда бе хьожаргва со, балха моттигаш хьакхоллаш, предприятеш болх беш хургйолаш. Лакха лоамаш доахаргда аргдац аз цIаккха а, из де дезаш а дац. Наьха вахара хьалаш тоадарца кхоачашхулаш да из».

Iаддалхьамида Бек-хан даькъалавувц ваьча денца ГIалгIайчен политиканца къахьегараша, шахьарашка, юрташка бахача наха. Уж дешаш дег чура доагIаш а да.

Из наха лоархIаш ва, ше ма варра гIалгIа волаш, наьха хьашташ довзаш, ший мехкахошта эшача новкъостал деш, визза къаман воI волаш, хьавоагIаш хиларах.

Къаман юкъарча «Сердало» газета болхлоша из шоашкара даькъалавувц, вай хьамсарча мехка, йоккхача Россе дика гIулакхаш кхоачашде эша ма волва хьо!

Ираз, могашал, тешаме новкъостий, котало хийла хьоца!

Беркате вахар хилда хьа!