«Кхераме йоаца ток» яха урок дӀайихьар Наьсарерча № 15 йолча ишколе
«Къилбаседа Кавказа россетий» «Ингушэнерго» яхача моттигерча болхлошца, кхетаче хилар берий. Дешархошта цар дийцар токацарча кхерамзленах, эггара хьалхарча юхьанца лораде дезарех. Берашта хайра, хӀана йиш яц трансформатора юхе ловза, ди деттача хана чкъаьрий лувцаш вагӀа, сигала урагӀъухийташ бола каьхатах баь фецара бӀехьал тока саьргех дӀатоссабелча, из мукъабоаккхаш валла.
ЦӀагӀа лелаеш йолча токацарча хӀамаех мишта лоравала веза дийцар берашка. Из тайпара болх тока оагӀон болхлоша массахана дӀакхухьаш ба. Берашта довза деза токацара лорадала дезараш. Цхьорой Башира, Ахилганаькъан Султана дийцар, ток йолча моттигашта гаргаваха, «селфи» яккхар кхераме долга. Хьалхадаьккхар, хаьда улла тока саьрг бӀаргабайча фу де деза. Из деррига дувцаш дола каьхаташ дӀадийкъар берашта.
«Бераша кхетадац, тока юхеахар мел кхераме да. Из царна хьалхадахар тха декхар да. Леладе йиш йоаца хӀамаш белгалду оаха кхувш латтарашта, дӀахойодача хана шоай сенах лорабала беза царна ховргдолаш», - белгалдир «Ингшэнергонна» кулгал деча ТӀоаршхой Рамзана.
«Россети» яхача моттиго дӀахьош программа я из. Ишколашка дӀа-хьа ухаш, берашта токацарча кхерамзленах дараш довзийташ къахьег тахан болхлоша. Программанна юкъе я тематически урокаш, яхьаш, викторинаш, тока моттигашкара экскурсеш. ЛаьрххӀа кийчдаь фильмаш дӀахьокх тока оагӀон болхлоша берашка. Иштта уж хӀамаш довзийт телевидене, радио, интернета бувзамашка гӀолла.
