Эсан гонахьара 80 гали гаргга нувхаш гулйир гӏо дераша-экологаша
Гӏажарий-Юрта Эсан гонахьара моттигаш цӏенъе арабаьлар «Гӏо дераш-экологаш» яхача оагӏонцара хьинардараш. Салоӏаш баьгӏарашта тӏехьара кегар дӏабоаккхаш, диззача пхе сахьата къахьийгар ӏаламах дог лазараша. Дизза 78 гали нувхаш гулйир цар хин бердашкара, лостам бе беза моттигаш кхы а яр.
«Геттара дукха нувхаш яр болам дӏахьош хиннарашта бӏаргаяйнараш. Кӏопилгаш, шушаш, пакеташ, кулгех хьекха каьхаташ дар хин йистошка дӏа-хьа кхийса. Аре мел я михо гӏеттадеш лела кулгех хьийкха каьхаташ гулде дар эггара халагӏа. ӏалама гӏулакхех йолча Министерствос еннаяр кулгахйоахкоргаши галеши. «Россе хиш» яхача Берригача мехка боламга гӏолла дӏахьош болх бар из. ООО «ЭкоЛайф» яр гулъяь нувхаш араяьхар.
Эсан гонахьарча моттигашка салаӏа безам бараш дукха хул, хӏана аьлча хоза ӏалам долаш моттигаш я уж. Бакъда хӏама бе-башха доацараша шоашта тӏехьа ютар во, ийрча лар я», - йоах «Сердалога» цу оагӏонцарча министерствера бенача хоамо.
Гӏо дераша-экологаша кхайкарал ду бахархошка, шоашта тӏехьара нувхаш дӏаяха, ӏалама моттигашта зе дерех ма хила, эхь хета, яхаш. Дуача хӏамах дизза тӏормигаш дахьаш хьадаьхкача, шоашта тӏехьара яьсса пакеташ, каьхаташ, шушаш дӏаяхьар вӏалла хало йолаш хӏама дац! Нувхий гувнаш шоашта тӏехьа дуташ, цхьане дӏайоахаргья-кх ераш сона тӏехьа, яхаш, дӏаахар эхь, юхь дайнача наьха гӏулакх да. Хьайбашта, ӏалама зе деш да из деррига. Ма хила шоай хӏаман моастагӏий, лорае Дала вайна хьаенна хоза моттигаш! Цӏаькха а юхадахка догдоагӏаргдолаш хоза, цӏена хилийта шоаш даьгӏача!
