ГӀалгӀайчен гаьнарча йиъ юрта ток дикагӀа лургйолаш, болх беш ба
«Къилбаседа Кавказ россеташ»-«Ингушэнерго» цӀенхаштта тоадеш я лакха вольт йолча (ЛЭП) «Махьмада ХитӀе-2-Керда Редант» тока саьргашта. Из болх дӀабахьара дӀадохийтаргда 4,5 млн сом.
35 кВ хьаозаш йолча мугӀарерча энергогӀишлос МагӀалбика кхален гаьнарча йиъ юрта токаца Ӏалашо ю: Кердача Реданта, Аьккхий-Юрта, Заьзгакъонгий-Юрта, Дабе-Юрта. Укхаза 12 эзар саг а вах, вахаре чӀоаггӀа эшаш йола лоархӀаме 12 моттиг а я.
Ара хаоттам чоалхане болча хана ЛЭП лерттӀа болх беш хургйолаш, тока саьргаш тӀа бужаш бола низ цар ловргболаш, хувцаш да 6,4 километр йола тока саьргаш. 998 тишденнача пелашта меттел оттадергда кердадараш. Из болх дӀахьош ва «Ингушэнерго» филиала 12 говзанча, царна гӀо деш я пхиъ лаьрххӀа йола техника.
«Махьмада ХитӀе-2-Керда Редант» - из 2024 шера хувца лерхӀаш хинначарех цаӀ яр, тишъенна хиларах. Халача лаьттан даькъ тӀа дӀахьош ба болх. Цхьа дакъа ЛЭП ушалаш йолча моттигашка улл: цига тӀаваха атта дац, цунга хьежжа дӀадодар а дукхагӀа да.
Бакъда цу моча хьалашка лелаеш вездеход оала машинаш я. Керттердар – тха говзанчий хьинар, балха говзал », - аьлар «Ингушэнерго» филиала кулгалхочо ТӀоаршхой Рамзана.
