ГӀалгӀай къаман
юкъара газет

«Хьаькъал дола» счётчикаш увттае арабаьннаб тока оагӀон болхлой

11.09.2023 14:35

«Хьаькъал дола» счётчикаш оттае арабаьннача «Россети Къилбаседа Кавказ» яхача оагӀон болхлошта духьале йир, вай мехкарча шин юрта. 2020-ча шера ахкан шоллагӀча бетта хьалхарча дийнахьа, токах долча закона юкъе хувцамаш дихьар.

Хьалха, счётчикаш дӀаувттаяр наха шоаш бе безаш болх хиннабале, карарча хана тока оагӀон болхлоша шоашта дӀатӀаийцад из гӀулакх. 2022-ча шера денз, вайна юкъе яьлар «хьаькъал дола» счётчикаш. Федеральни законага гӀолла дӀахьош ба тахан из болх «Ингушэнерго» яхача моттиго. 2023-ча шера 3 эзар совгӀа счётчик ийцай цар. Цул совгӀа, ток ца яйтара тӀехьа, тишъенна линеш хувцаш болх дӀакхухь. Республикерча моттигашка 9 эзар совгӀа счётчик таханарча дийнахьа дӀаоттаяьй тока оагӀон къахьегамхоша. СоагӀапча, Наьсаре, Эккажкъонгий-Юрта, Сурхо тӀа, Ӏаьлий-Юрта, Пхьилекъонгий-Юрта, Буро кӀалха из болх дӀахьош латт. Пхьилекъонгий-Юрта, Сурхо тӀа уж счётчикаш оттаеш баьхкача болхлошта бахархоша духьале йир. «Керда счётчикаш оттаяро дикка аттачахьа боаккх из болх. Цкъа дӀаоттайича, кхы кулгаш детта, хьежа ца везаш я таханара счётчикаш. Токацара болх ше ма барра хьахьокх цар», — аьлар «Ингушэнерго» филиала кулгалхочун гӀонча волча БӀарахой Рашида. Цул совгӀа, ца доагӀа кулг техача, цох хоам беш хургья керда счётчикаш. Бокъо йоацаш ток лечкъаерий аьттув бехкаш я уж. "Ӏаьдала бокъонца доаццача тайпара, ток йоае безам бараш ба счётчикашта духьала бараш. Дале а, оаха из проект дӀахьош болх бергба",- белгалдир БӀарахой Рашида. Ӏаьдала болхлой, моттигашкара администраци оарцагӀайоахаш дӀахьош да из гӀулакх.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде