Лочкъаяь ток вайцига дукхагIа юридически наха тIа я. Укхаза энергетикаша сатувс Iаьдалца цхьана беча балха толамашка, каст-каста рейдаш еш бола болх дIахьош хиларга гIолла. Керда бооккха гIа — йоккхача предприятеша йоагаю ток гучаяьккхар (ПКУ). ХIанз укх сахьате республике 25 цу тайпара прибораш кийчъяьй 22 бизнес-организацешта. Кхы а 14 ПКУ оттаергья токаца болх бераша, карарча шера тов бетта. Цу тайпара болх дIабахьаро таро хулийтаргья лохагIа мах балар духьа лечкъаеш йола электроэнерги юхасоцае, законах доагIача беса мара из йоага ца яйтар чIоагIдергда. Цул совгIа, цу тайпара Iаьдала зе деш бола нах гучабоале, уж уголовни бехктокхаме озаргба. Ювцача проектах болх беш, энергокомпанена халонаш нийсъелар «Ангушт» яхача базар тIа, Наьсарен-Шахьара МутаIаланаькъан урамагIа дIаоттаяь ши ди мара доаца счетчик, герз теха, йохаяьяр. Цунна меттел энергетикаша коммерчески прибор оттаяьяр, из а иштта йохайир. Из нийсдаларах лаьца, республикан Iаьдалга ток лоаттаераша каьхат яздир. Цунах уголовни гIулакх хьадийллад. «Россеташ Къилбаседа Кавказа» геттара чIоагIа тIахьожам лоаттабу, боарамал совгIа йоагаеча сердала. Из дош сердалцара хьал дегIадоаладара керттерчарех лоархIаш а да, — аьлар «Ингушэнерго» филиала кулгалхочун заместитела декхараш кхоачашдеш волча БIарахой Рашида. — Боарамал совгIа йоагаеш йола электроэнерги энергокомпанена хулаш дола зе да. Из хьожаде дезаш хул болхлой Iомабара, оборудовани эцара, прибораш оттаяра, социальни хаттараш кхоачашдара. НийсагIа аьлча, энерги лораяро таро хулийт мехка тешаме энергеца Iалашо е». Хьалхадоаккх, бокъонах доацаш ток чуйиллар, шоашкара прибораш оттаяр, кхыча тока аьшкасаьргах дIахоттар кхераме да цIи ялара. Цул совгIа, бокъонаш телхаераша деш дола зе ше ма дарра Iаткъаш да ерригача республике а дика сердал хилийтара.