Тахан говзанчаш баха хилар Наьсаре тӀахьожама болх дӀабахьа. Из болх дӀабахьа лаьрхӀар Горчхананаькъан, Цисканаькъан урамашка, хӀана аьлча цу урамашка бахача наха шоашта электроэнерги лоаттаеча организацена хьа ца луш даьлла декхар дар 2,4 миллион сом. Энергетикашца цхьана болх беш хилар, къаман телерадиокомпане корреспонденташ. Болхлой тоабо хьалхарча аргӀагӀа счётчикашка хьожаш бола болх бир, уж хьаяьста хиннайий а, технологех йоагӀаш уж оттаяьйий а, ток къайлагӀа чуйиллайий а, кхычахьа гӀолла хьачутессайий а хьожаш, болх дӀабихьар цига. Геттара юхамаччахьбаьнна кхестача, Ӏаьдала ахча хьа ца луча нахаца болх бир, царна декхар хьацадаларах малагӀа бехк бергба хьалхадоаккхаш. Цу тайпарча цхьаболча наха шоашка доаллаш дола Ӏаьдала ахча цу моттиге хьаделар, цу даькъ тӀа из болх дӀабахьарах 146 эзар сома кӀезигӀа хилар декхар. Декхар хьа ца лу дукха ха хиларах, шин вахархочун сердал Ӏохоадайир.

«Йоагаяьча электроэнергех Ӏаьдала декхар оаха хьадоаккхаш хиларо таро лу, бисарашта электричествоца Ӏалашо е, мехка из болх лерттӀа лоаттабе, гӀирс тоабе, кердабаккха вӀаштӀехьадоал», - аьлар «Ингушэнерго» филиала кулгалхочо ТӀоаршхой Рамзана. - Цхьаболча наха шоай ханнахьа токах доагӀа ахча хьалуш ца хиларах, республиканна Ӏаткъаш хул: электричество лоаттаяра болх эсала латташ хилча; наьха цӀагӀара токаца лелаю оатхалаш йохаш а лелхаш а моттигаш хул, цул совгӀа, наьха вахара а кхераме да из».

«Къилбаседа Кавказа россетий»-«Ингушэнерго» филиала хьалхадоаккх; ший ханнахьа йоагаяьча светах доагӀа Ӏаьдала ахча дӀадалар (бетта 10-ча денга кхачале, тӀехьа тӀайоагӀа рассчетни чот хьатӀаялехь) чӀоагӀа лоархӀаме да, аьнна. Ахча дӀадала йиш я наьха хьашташ кхоачашдара йолча центре гӀолла, «Свет Онлайн» яхача телефона тӀа йолча приложенех, «Доалахьара кабинет» яхача компане сайтага гӀолла, иштта кхыча, ахча дӀачуэцаш йолча пункташка гӀолла. Нагахьа санна цхьадолча бахьанех абонент деррига декхар дӀадала кийча веце, из ший доазон тӀа ток лоаттаеча отделене ваха веза, ший декхар дӀадалара хьал аттача даккхийта дагахьа.