Гӏалгӏайчен Паччахьалкхен галерее дешархошта дийцар Россе кердача моттигех
Гӏалгӏайчен Паччахьалкхен гойтама галерее дешархошта лаьрхӏа интерактивни гойтам хилар. Из хетабаь бар Россех Донецки, Лугански халкъа республикаш, иштта Запорожски, Херсонски областаш хьакхетара. Кхетаче дӏайихьар мультемедийни технологей даькъ тӏа. Йоккхача экрана тӏа берашта гойтар сурташ: видеоханорг, архивера каьхаташ, тешалаш. Царга гӏолла го йиш яр цу моттигий хана йӏоахалца бе бийза никъ, культуран тӏехьале, ӏалама мах бараш, уж Россех хьакхетара керттера наькъаш.
«Экрана тӏа сурт доккха хиларо таро елар хьагойташ дар дикка къоастаде. Дешархошта бӏаргадайра ширача заман сурташ, сийлен улгаш, Донецка, Луганска, Мелитополя, Херсона архитектура, промышленноста, юртбоахама кхаленаш, культуран тӏехьале (музейш, театраш, элгацаш), къаман вахар, ӏадаташ. Керттердар Российски Федерацех моттигаш хьакхетача хана, кулг яздеш хинна ха гойтар, цига го йиш яр наьха сурташ, уж бар дувца мехкаш дегӏадоаладеш шоашкара дакъа лаьцараш.
Цул тӏехьагӏа берашта могадир цигара географи, истори довзар. Кхетаче лаьрхӏа яр царех лаьца берашта дукхагӏа дувцара, уж царна дикагӏа довзийтара. Уж балхаш лоархӏаме да кхувш йоагӏача тӏехьенна, цар дикагӏа вӏашагӏдолл мехкех а уж хьакхетарах а дола сурт», - аьлар Гӏалгӏайчен Паччахьалкхен галерее «Сердало» газетага.
Дешархой юстара бисанзар цу деша: гуш дар уж терко тӏайохийташ хилар. Бераш дика ладувгӏаш дар лекци дӏахьош, цул тӏехьагӏа цар чулоацам болаш шоай хаттараш делар. Программа яьнначул тӏехьагӏа а, цар дукха ха яьккхар бӏаргадайнар шоайла дувцаш.
Из болх вӏашагӏбеллараша яхачох, цу тайпара берашца къахьегаш хилча, цар дикагӏа кхетаду шоашта довзийташ дар.
