Сага шокъ йоалаеш дола ловзараш леладаьр суде кхаьчав
Бокъо йоацача тайпара саг геттара чуозаш дола ловзараш доаржадаьрий гӀулакх судага гӀолла къоастадергда. Из хоам «Сердалога» бир республикерча Россе СК СУ.
МагӀалбика кхалерча Россе СК СУ тохкама оагӀон кулгалхочун гӀончас техкар бӀарччача тоабо интернета оагӀонашка гӀолла саг геттара тӀаозаш дола, шортта ахча доаккхаш хинна ловзараш доаржадарах дола гӀулакх.
«Тохкама болхлоша гучадаьккхар, цу наха 2020-ча шерарча Ӏан хьалхарча беттагара 2021-ча шера ахкан хьалхарча беттага кхаччалца, хӀаране ше-ший декхараш дола тоабаш вӀашагӀъехка, бокъо йоацача тайпара ловзараш доаржадаьлга. 1 800 000 сом совгӀа ахча да цар из гӀулакх леладеш хьадаьккхар», - йоах хоамо.
Цу наьха лаьттан доазув, машина, иштта лицевой счет Ӏаьдала болхлоша дӀакъайлай, иштта Ӏаьдало лохаш ва цу юкъе дакъа лоацаш хинна кхы а ши саг. Из гӀулакх гучадоаккхаш болх дӀабихьараш - республикерча МВД УЭБиПК, моттигера Россе УФСБ болхлой. ДӀахо судо къоастабергба царех хӀаране бехк.
