«Лораергья вай хьу» яха кхетаче, Гӏалгӏайч мехка дӏахьоргья, ардара бетта 24-ча дийнахьа
Гӏалгӏай мехка дӏаяхьа лаьрхӏар «Лораергья вай хьу» яха Ерригроссийски болама центральни кхетаче. Юххьанцахьа из дӏаяхьа лаьрхӏадар ардара бетта 21-ча дийнахьа, бакъда из болх вӏашагӏбеллараша лаьрхӏар из ха хувца, яхаш, дийцар «Сердало» газетага, республикан ӏалама Министерстве.
Болам хургба керттерча моттиге, Шолжа кхален Мужеча, спортацардар шаьрдеча моттиге. Укхаза дӏайогӏаргья 2000 къона га, цар хоздергда спортивни комплекса доазув, иштта доккха дакъа юкъедахьаргда кхален экологически хьал тоадара.
Карарча шера из дӏахьош хилар лоархӏаме да, из хетадаь да Россе цхьоагӏон Шу хилара. Хьамсара мохк баьццарберзабеш цхьана къахьегар; цхьоагӏон, юкъарча доттагӏала, иштта мехка ӏалама тӏехьале лораяра, из хургдолча ноахалашка кхачийтара белгало я.
«Лораергья вай хьу» яха Ерригроссийски акци лаьрхӏа я хьун мах бараш меттаоттадара, ӏалама тӏехьале лораяра, гонахьара экологически хьал тоадара. Из проект лоархӏам болаш я берригача мехка а, цун кӏоарга маӏан да 2026 шера Россе дерригача даькъ тӏа 70 миллион га дӏайогӏаш хилар.
Гӏалгӏайчено, цу къаман баьццарча болама юкъедена дакъа лоархӏаме хургда. Из болх дӏахьочар тӏахьех вай бахархой, шоатта дийнахьа дӏахьоча цу боламе дакъа лаца, вай республика цхьана кхы а хозъяра.
