«Зизай аре Оаздик» яхача моттига хьал тохкаш хилар вай мехка
Ӏалама гӏулакхех йолча Президентски ганзо грантаца хьаллоацаш йолча «Кхаь оагӏон бувзамаш: ООПТ - ӏилма - Волонтёраш» яхача экологически проектага гӏолла, мехка лоамера моттигаш тохкаш хилар. «Зизай аре Оаздик» яхача туристически, ӏилман доазон - наькъа хьал довза арабаьнна нах бар уж. Проекта тоабан доакъашхой, гӏо деш лелараш, цу оагӏонцара говзанчаш бар вӏашагӏкхийтта хиннараш. ӏилман, ӏалама оагӏонца дувзаденнарашка гӏолла дӏахьош бола боккха болх ба ала деза цох.
Кагирхой гӏулакхех йолча Комитетера «Сердалога» кхаьчача хоамах, лоархӏаме декхараш да цу наьха кхоачашде дезараш. Кхоана туристаш, ӏилманхой лела безача наькъа лаьтта, цун хьал миштад хьожаш къахьийгар цар.
Иштта хоам беш дола, никъ бовзийташ дола улгаш оттаде деза моттигаш белгалйир цар. Экскурсе оагӏонца геттара лоархӏаме дола хӏамаш да уж, хӏана аьлча, туризмаца терко е езарех да моттига ӏалама, кӏалхарча кӏийлен, гонахьен хӏама.
Уж деррига хӏамаш проектаца дӏачӏоагӏдеш да. Из никъ паргӏата, цхьаккха кхерам боацаш хургболаш дӏабахьа безача балхаца эшаш да из.
Цу гӏулакха хьалхаэттараша белгалдечох, экологически оагӏонцарча проектаца лоархӏаме дола гӏулакхаш да уж. Хьабеллаш болча кердача туристически, экологически наькъа хьал боаггӏача боараме меттадоаладаь хила деза.
