ГӀалгӀайче тохкаш да, ГӀажарий-Юртал арахьа нувхаш лотаялара бахьан
01.09.2023 10:44
ГӀалгӀайчен ГӀажарий-Юрта, Ӏалам лорадераша тохкаш да, нувхаш лотаялара бахьан. ГӀалгӀай Республикан Ӏалама ганзий, экологен министра декхараш кхоачашдеш вола Хьулахой Саварбик хӀанз укх сахьате цу моттиге ва, яхаш дийцар «Сердало» газетага моттигерча министерстве.
«Из цига вахара бахьан, кхалаж тӀа дӀакхайсача чӀоагӀача нувхех цӀи яьнна хилар дар, хетаргахьа, 100 квадратни метр хиллал моттиг дӀалоац цо. ХӀанз цига нувхаш йоагаш хиларах, дукха кӀур латташ, из къаьстта мел моттиг дӀалоацаш я ха хала да», — йоах тхога хьабайтача хоамо.
Министраца цхьана цу моттиге хьабаьхкаб «Экосистема» оалача ООО викалаш, Росприроднадзора болхлой, иштта цига кхача безаш ба Шолжа кхален, ГӀажарий-Юртарча администрацей викалаш.
ГӀулакх довзараша белгалдергда, кхалаж тӀа лотаенна цӀи дӀайоаяра хьалхарча аргӀагӀа де дезар.
