Вай хьунашкарча оакхарий, оалхазарий хьал тохкаш ба тахан
Укх бетта 15-ча дийнахьа денз, хьунашкарча оалхазарий, оакхарий хьал тохкаш бола болх дӀаболабаьб вай мехка. Из хоам тха «Сердало» газетага бу Ӏалама гӀулакхах йолча министерствон къахьегамхоша.
«ЛаьрххӀа оттабаьча балхаца, 109 новкъа къахьега дезаш ба хьун хьал лорадераш укх шера; оакхарий, оалхазарий лоархӀаш, вахар теркалдеш.
Лай тӀа юсача ларех дагарду оакхарий, хӀаьта оалхазараш - цхьана гулдаларца. Из болх дӀабахьара чӀоагӀа лоархӀаме да, даша ца дашаш, лоа уллаш хилар», - белгалдир цу гӀулакхах бехктокхамечар.
Шин даькъаца дӀахьош болх ба из. Эггара хьалхарча аргӀагӀа лай тӀара лараш дагаръяь дӀайоае еза, шоллагӀча дийнахьа теркалъю керда хинна лараш.
Боккха болх ба из, чӀоагӀа фийла хилар эшаш. БӀаьстан хьалхарча бетта 15-ча денга кхаччалца дӀабахьа безаш хул из. Цул тӀехьагӀа ховргда, вай хьунашка мел оакхарий, оалхазараш да. БоаггӀача боараме из болх дӀахьош хиларо аттача доаккх, хьун хьал лорадарца дувзаденна гӀулакх.
