ГӀалгӀай къаман цӀихезача виӀий Заьзганаькъан Идриса 128 шу дизарга
Карарча шера вай дездергда, гӀалгӀай паччахьалкхен 100 шу дузаш хилар. ГӀалгӀай паччахьалкхе хьакхоллаш, цунна керте лаьттар, цу тӀехьа къахьийгар цун хьалхара кулгалхо Заьзганаькъан Идрис вар. Тахан цу цӀихезача, гӀалгӀай къаман визза воӀ волаш хьавенача цун 128 шу дизад.
Идриса да вар халкъа хьехархо, из хьехаш вар Наьсарен лоаман ишколе, цига Заьзганаькъан Идриса яьккхар юххьанцара ишкол. Заьзганаькъан дезале дешар чӀоагӀа лоархӀаме дар, цо дӀахо дийшар Владикавказа реальни училище, цул тӀехьагӀа Москверча юртбоахама институте деша эттар из. Цун вахар - из да дешаро лерттӀа саг веш хилара дола масал», - аьлар ГӀалгӀайчен Кулгалхочо Келаматанаькъан Махьмуд-Ӏаьлас.
Октябрьски революци яьнначул тӀехьагӀа хьакхеллача Лоаман республике, Заьзганаькъан Идрис чурча гӀулакхий наркома декхараш кхоачашдеш, Центральни исполнительни комитета кулгал деш хиннав.
1924 ча шера аьтинга бетта ворхӀлагӀча дийнахьа, ГӀалгӀай автономни область хьакхеллай, цун керте эттав, чӀоагӀа оамал йола, аьннача дош дола, ший къам дезаш вола Заьзганаькъан Идрис.
Цу дарже волаш, 5 шу совгӀа ха яьккхай цо, бакъда политико кхостабаьча баланна юкъеболхцун дезал а. Ший фусам-наьнаца Жанеттайца цхьана из лоац НКВД болхлоша. 1938 шера цун валар хилар, Шолжа-ГӀалий тӀарча набахта.
Цун деррига вахар хиннад денал, майрал, нийсхо гойташ; ший къаманна мутӀахьа волаш хьавоагӀаш вар из. ГӀалгӀай къаман эшаш а дикагӀа дола вахар цунна дала гӀерташ а вар.
Дала эша ма болба ГӀалгӀайченна Заьзганаькъан Идрис санна бола къонахий. Дала гешт долда цунна!» - яздаьд ший телеграм-оагӀон тӀа ГӀалгӀайчен Кулгалхочо.
