«Россети Къилбаседа Кавказ» яхача моттигерча болхлошца, рейд дӀаяхьа арабаьлар журналисташ
08.09.2023 00:44
Илдарха-ГӀалий тӀа рейд дӀахьош хилар «Ингушэнерго» болхлой. Бокъо йоацаш ток йоагаю моттигаш гучайоахаш, хьаӀайна декхараш гулдеш, болх дӀабихьар цар. Загордни оалача урама тӀалаттар тахан 1,4 млн сом декхар да. Цу гӀулакха арабаьннача болхлоех хьакхийтар къаман телерадиокомпани. Цхьана дӀабихьача балхах, дикка пайда хилар. 88 эзар сом декхар хьагулде аьттув баьлар цу дийнахьа. Цхьаккха каьхат доацаш, ток йоагаеш хиннача йиъ моттигера токасаьргаш дӀахоададир.
«Ханнахьа ахча дӀадала дезарца, оттаяь бокъонаш лорае езарца дувзаденна къамаьл дир болхлоша бахархошца. Хьалхадаьккхар, ток лечкъаеча, декхараш Ӏоадеча наха духьала боккха болх дӀакхухьаш латтилга. Массараша кхетаде деза, наха ханнахьа ахча хьадаларга хьежжа мара, кулг тоха деза моттигаш тоаеш болх дӀабахьа аьттув хилац тха. Республике лерттӀача боараме токацара хьал латтаргдолаш, бахархоша хан-ханнахьа декхар дӀачутела деза», — аьлар филиала кулгал деча ТӀоаршхой Рамзана.
Ший цӀагӀа ваггӀаше, «Ший доалахьарча кабинета» гӀонца «Сердал Онлайн» яхача мобильни оагӀонга гӀолла компане сайте тӀа дӀадала йиш я ший декхар. Нагахьа, шийна тӀалатташ дола деррига декхар дӀадала низ боацаш вале, ток лоаттаеча моттиге дӀаваха, ший бахьан дӀаала деза.
