Дицлургдоаца дешара шераш
Ишколашка бийкар тӀеххьара гургал
Берригача мехкарча ишколашка санна, вай республикерча дешара моттигашка а бийкар тӀеххьара гургал. БӀаьш бола вай къона мехкахой ишкол яккхарах дола тешал хьа а ийца, кердача а боккхача а вахара новкъа баргба кастта. Царех хургба вай халкъа боахама чӀоаггӀа эшаш бола балха говзанчаш: лораш, гӀишлонхой, водителаш, юристаш, хьехархой, царех тарра кхыбараш. Царна юкъе ба Сурхо тӀара 9 шера деша ишкол яьккха кӀаьнкаши йиӀигаши. Ши класс яьлар цу юртарча ООШ оалача ишколе укх шера дийша. Цхьанне чу 21, вокхан чу 22 дешархо вар цига дешаш. Царех саг тӀера ца воалийташ, лорабеш, дешара тӀехьа тӀахьожам лоаттабеш хьабоалабир уж, ишкол яьккха баллалца, цар классай кулгалхой болча хьехархоша Овшанаькъан (Тутайнаькъан) Мусай Маккаси Котанаькъан Салмана Ахьмадеи.
Царна юкъе къаьстта белгалбаьнна, дика дешаш хьабаьхкар Исмейланаькъан Ӏайна, Эсамарзанаькъан Тамара, Овшанаькъан Фатима, кхыбараш. Царех вай мехка чӀоаггӀа накъабоалаш къахьегамхой хургба, аьнна, хет; дӀахо дӀайодача хана. Цхьачар хӀанззе хержаб шоай вахара никъ. Масала, Хабренаькъан Хьава медколледже деша яха ловш я, медсестра хила лов цунна; Овшанаькъан Яха а колледже яха кийчлуш я, цунна безабеннаб царгий лора болх.
Ӏуйрийна 10 сахьат даьлча, дӀадоладелар ийс шера дийшача ишколацара къаста вӀашагӀкхетар. Из дӀадахьа аьнна тӀадилладар дийша баьннача Булгучанаькъан Ӏусманаи Муцолганаькъан Ӏашатаи. Йийкар Россе а ГӀалгӀайчен а гимнаш, гулбеннача дешархошта, даьшта-ноаношта, хьехархошта хьалхашка къамаьл дир ишкола директора Хидренаькъан Мухтара Любас, завуча Овшанаькъан Марема, выпускникий хьалхарча хьехархочо Исмейланаькъан ПаьтӀамата, цхьан хана из ишкол яьккхача, хӀанз МВД болхло, майор яха эпсара цӀи лелаеча Овшанаькъан Залинас, классай кулгалхоша, берий ноаноша, выпускникаша шоаш. Царех дуккхачарна тамашийна хоза зизай цӀовнаш делар, из ди къаьстта хоздеш а деза хилар белгалдеш а. ХьатӀакхаьчар цу ден керттера моттиг - бийкар тӀеххьара гургал, из тоха бокъо еннаяр ишкол яьккха ваьннача Овшанаькъан Мурадаи цу тайпан цхьоалагӀча классе ягӀача йиӀигаи.
Дешархой дӀа-юха къастале, дийкар иллеш, халхара ашараш; ишколе даьха шераш дицдергдоацаш, сурташ даьхар.
