Гӏалгӏайчен Кулгалхочо тӏахьийхар, даьй гӏалашта тӏагӏолла довнаш цахьедара
Гӏалгӏайчен Кулгалхочун къаманца къамаьл долаш, республикан бахархоша даьй гӏалаш тоаеш хилара хаттар айдир. Лохерча Ачалкхе вахача Кийнаькъан Р. хьоадир гӏалаш бахьан долаш тайпашта юкъе латта цатоамаш, уж меттаоттаеш болх дӏахьоча хана уж нийслуш хилар.
Республикан Кулгалхочо белгалдир, цу тайпара цатоамаш шоай овлаш дика довзаш цахилар бахьан долаш нийслуш да, аьнна. Цо аьлар, гӏалаш хьалъяьй, дӏахо меттаоттаяьй дукхача ноахалаша, цхьан сагах хьадоладенна фу дукхача тайпашка дӏа-юха декъалуш хьаденад. Келаматанаькъан Махьмуд-ӏаьлас яхачох, гӏалаш вай юкъара мах бола тӏехьале я, цудухьа цар да малагӏа ва яхилга нийса дац. Цо тӏахьийхар бахархой шоай тайпай истори дикагӏа ӏомадара, даьй тӏехьале къовсаме цаяккхара.
Иштта Келаматанаькъан Махьмуд-ӏаьлас ма дарра дийцар архитектуран сийленгаш тоадара Жӏайрахьа кхале дӏахьоча балхах. Цо баркал аьлар Гуцаранаькъан Микаила, из программа цо кхоачашъеш хиларах.
Таханарча денга кхоачаш, Гӏалгӏайче чӏоагӏдаьд 4 100 культуран тӏехьален гӏишло хилар, царех 351 паччахьалкхен реестра чуйоагӏаш я. 2023 шера денз, Гуцаранаькъан Микаила новкъостал а деш, тоадаь даьннад 186 сийленг, хӏаьта 2026 шера говзанчаша кердайоаккхаргья кхы а 76 моттиг.
Республика иштта дика кийчо еш я цу тайпара болх дӏахо дӏабахьара. Хӏанз 11 архитектуран моттигаш тоаяра проекташ оттаеш я, иштта Тӏаргим яха моттиг меттаоттаеш болх беш ба. Говзанчаша 270 сийленга экспертиза яьккхай, цар белгалду 152 моттиг лораяра доазув хьакъоастадеш хилар.
2026 шергара 2028 шерга кхаччалца, федеральни бюджетера республикан исторически тӏехьале лораяра 650 миллион сом хьахьожадаьд.