Мехкадас тӏадиллар, Магӏалбика кхален фермера лаьтта даларца дувзаденнача хаттарга хьажар
Гӏалгӏайчен кулгалхочун Келаматанаькъан Махьмуд-Ӏаьлий къаманца къамаьл долча хана, моттигерча фермерашта лаьтта далара хаттар дийцар. Республикан Кулгалхочунга из хаттар делар Магӏалбика кхален 25 шу даьннача вахархочо Ӏалбаканаькъан Ӏаддала. Из ва, ший доалахьара хьайбаш леладу боахам дегӏабоалабеш. Хӏанз цун 100 гаргга бежан да, 1000 гаргга устагӏа ба.
Къонача фермера ший доалахьа лаьтта цахилар бахьан долаш, цун кхыча сагагара арендах йоал телаш лаьтта леладе деза, цу гӏулакха йоккха таро эш. Цудухьа цо дийхар хьайбаш леладара шийна лаьтта далар.
Келаматанаькъан Махьмуд-Ӏаьлас Магӏалбика кхален администрацена хьалхашка декхар оттадир, цу боахаме баха, из тахка, цу фермера дала йиш йолаш мукъа лаьтта дий хьажа, аьнна.
Республикан кулгалхочо терко тӏаяхийтар мехка лаьтташ кӏезига хилара, цудухьа цу тайпара хаттараш кхоачашдара фермера хьалашка, кхален таронашка хьажа везаш хилара. Цо хьадийхар, нагахьа мукъа лаьтта корадаь моттиг хуле, цу сага новкъостал дар, гӏо ца деш вуте, цох хоадам боллаш хоам бар, даьсса къамаьл а доацаш.
Гӏалгӏайчен Кулгалхочо белгалдир, шоай доалахьара боахамаш дегӏадоаладеш болча наьха къахьегам лоархӏаме хилар, республикан кхачан кхерамзлен Ӏалашо яра цар доккха дакъа юкъедахьаш хилар.