ХӀаьта а наха уж книжкаш долга а цар автораш къахьегаш болга а дӀахайта гӀерташ хьадоагӀа тхо, тхоай низ дӀакхоачачох. Хьалхара Ӏайшета книжка юкъара да, «Вай заман йоазонхой энциклопедически дошлорг» аьнна цӀи тиллай цох. Книжка ше, ший боарамга диллача шера а доккха а да, бакъда цох тилла цӀи а цун чулоацам а вӀаший барт беш дац. Таханарча дийнахьа вай заман Россе йоазонхой эзараш ба, книжка цӀи Ӏойийшача уж берригаш цунна юкъебихьаб аьнна хеталу, амма книжка ше хьадийллача, цу тӀа вац верригаш 44 виъ саг мара. Вешта аьлча, зарба техача моттиго ший цӀерца дӀатардаьд книжканна юкъебахача наьха таьрахь. Из нийса дац, цхьаккха тайпара цунга йоагӀаш яц книжках тилла цӀи. Мичча беса дале а, цунна юкъеяхай вай мехкахо Мухьмада Ӏайшет. Книжка тӀара еша йиш я йоазонхочун биографи, довза йиш я цунна тийнна совгӀаташ, наха цун кхолламах хетараш.

ШоллагӀдола книжка «Дала лелабу хоза мохк, хьамсара ГӀалгӀайче» яхаш да. Из байтий гуллам ба. Тематически оагӀув тайп-тайпара йолаш да дувцаш дола книжка. Цу тӀара еша йиш я  Даьхенах, мехкахдахарах, Ӏаламах, Ӏадатех, лоаман мехках, гаргарча нахах йола байташ. Дикка моттиг дӀалоац белггаларча наха хетаяьча байташа. Масала, книжка тӀа я Крупнов Евгенена, Малсаганаькъан Оарцхона, Хьоашаланаькъан Ӏаьланна, Овшанаькъан Руслана, Чахкенаькъан Капитона, Осканаькъан Сулумбика, Албохчанаькъан Лейлайна, кхычарна хетаяь байташ.

Хьалхара книжка 3 эзар арадаьннад, шоллагӀдар – 2 эзар. Йоазонхочо ший йоазош эрсий меттала ду. Аз сайна хьалхашка оттадаь декхар дар, уж арадаьнна хиларах хоам бар. Цар чулоацама мах а дикал-вол а дешачар шоаш къоастаергья аьнна хет сона.