«Хьаьшашта кийчдаьдар гӏалгӏай къаман, иштта ерригача паччахьалкхен   дукхача къамий  культураш, ӏадаташ гойтар. Библиотеке гойта оттаяьяр исторе, этнографе тематически майдаш; книжкай-гойтамгара искусствон кхоллама кхетаченашка кхаччалца», - аьлар «Сердало» газетага Гӏалгӏайчен культуран, туризма Министерстве.

Из болх вӏашагӏбеллараша керттера терко тӏаяхийтар гӏалгӏай мотт лорабара. Гулбеннарий таро хилар говзанча хьехамашка ладувгӏа; поэтически дешарашка, культурашта юкъера бувзам чӏоагӏбеш долча къамаьлашка дакъа лаца.

Библиотеке дӏахьош хинна «Библиобийса» яха программа дика вӏашагӏъеллаяр, цунна чуйоагӏаш яр еррига искусствон оагӏонаш; хореографегара кинематографега кхаччалца.

Цӏай хьадийллар лаьрххӏа, хоза кийчъяьча программаца  «Шолже» яхача халхара ансамбло . Цо сийрдаяьккхар сайре, белгалдир хьаьша тӏаэцар, мехка культуран мах бараш.

«Керттерча библиотеке дӏахьош хиннача программо цхьаккха а юстара витанзар. Кхетачен керттера дакъа - из хӏамах дог лазаш бола нах вӏашагӏтохаш яр. Цига  къаьгга гойташ дар библиотеко малагӏа дакъа дӏалоац, культурашта юкъера къамаьл леладара никъ ше хиларах тарра.

Дешархошта гӏулакх лоаттадара йолча отдела заведующе Цӏечой Ясминас, ше къамаьл деш, хьаьшашта хьалхадаьккхар «Библиобийса» яха болам хьакхоллара  истори, бакъда цо иштта белгалдир карарча шера дӏахьош йола кхетаче ший тайпара хилар.

Къаьстта безам тӏабодаш бар цо гойта книжкашка даьхкача суртий гойтам, из боккъонца бола,  Россе къамий литературай дукхача оагӏорахьара кеп гойташ бола болх бар. Композице таро елар гулбеннарашта культуран оагӏоний дукха къайленаш йовза, уж къаьгга гуш хул тайп-тайпарча моттигашкара кхоллама болх лелабеча авторий книжкашка хьежача.

Моаршал хоатташ дош аьлар ГӏР НБ библиотека болх лелабеча  кулгалхочун гӏончас  Малсаганаькъан Лидас. Ше къамаьл деш, из хоадам боллаш сецар проекташ лоархӏаме хилар тӏа, царех цхьаяраш республикан Къаман библиотеко дика маьхалйоахаш хилар тӏа, цун болх дин цхьоагӏо чӏоагӏъяра, кхетам балара, лерхӏама, къамий ӏадаташ лархӏара тӏаберзабаь хилар тӏа.

Шоаш дувцаш дар дикагӏа кхетадергдолаш, къамаьлаца цхьана хетта яр гойтам бовзийтара оагӏув. Йоккхача экрана тӏа гуш яр видеороликаш, цу тӏа ГӏР НБ эггара сийрдагӏа йола дӏаяхача ханашкара моттигаш  белгалйора. Цар хьагойтар, Гӏалгӏайчен керттерча библиотеко Россе юкъарча культуран даькъ тӏа керттера моттиг дӏалоацаш хилар, цо къамашта юкъера гӏулакхаш леладара юкъедахьаш дола дакъа. Цу тайпарча моттиго таро елар юкъарча гӏулакха ше дакъа вена хилар хӏара сага хоадалийта. Россе культуран тӏехьале лораяра, совъяккхара шийгара дакъа лоацаш хилар хӏаравар.

«Библиобийсан» керттера дакъа дар «Даха, илли, даха!» яха кинорежиссёра Къоастой Мадинай фильмага хьажар. Из кино даьккхад йоккха проект дӏахьош, цо дийцар лоархӏаме ашарий тӏехьален хаттараш.

Сайрен литературни дакъа латташ дар шин оагӏонах. Йоазонхо, журналист волча Матенаькъан Илеза дийцар ший балхах, гӏалгӏай халкъа багахбувцам лорабеш, гулбеш ше хиларах, цо хьаьшашта хьалхадаьккхар къаман хьаькъале дувцараш лорадар лоархӏаме долга. Россе йоазонхой доакъашхочо Боазаркъанаькъан Элинас, из кхетаче дӏахьош, дийцар таханарча литературах шийна хетар, цо иштта ший кхоллама болх бовзийтар книжкаш дешарашта.

«Библиобийсо хьаьший терко тӏаэзар йоккхача композицеца, из йоаржаяьяр библиотекан керттерча зале, цо вӏашагӏтехар говзаме дош, халкъа кхоллам.

Керттера моттиг укхаза дӏалаьцар боккхача книжкай гойтамо.  Цунга гӏолла го йиш яр наггахьа мара гуш доаца таханара йоазош, цар тӏа дувц вай боккхача мехка дахаш долча къамий культурех, ӏадатех.

Лоархӏаме моттиг цу юкъе дӏалоацаш дар гӏалгӏай къаман литература. Цу оагӏоно таро елар гулбеннарашта  хьамсарча мехка культура кӏоаргга йовза. Укхаза дар лоархӏаме тохкамаш, исторически очеркаш, сийрдача исбахьален литературан кхоллама балхаш, гӏалгӏай авторий хоза наьна мотт.

Цӏай программанна юкъе дар кулгаговзала балхаш - Шолжа-Шахьара дешархоша шоай кулгашца хьакхелла  хӏамаш. Царга хьежача гуш дар, чӏоагӏа теркам тӏабохийташ, хоза маха баьккха хилар, къаман ӏадатий лар юташ хӏара болх ший тайпара хоза баьбар. Цо тешал ду шоай къаман хозал, куц тахан лорадеш хилар вай кагирхоша, тӏехьено.

Цига хиннача наьха таро хилар Россе тӏехьален дийна культура го, шоашта цхьацца дола кердадараш хьаделла, довза.

Программа чакхйоалаш, концерт делар. Сцена тӏа арабаьлар Гӏалгӏайчен Хамхой А. цӏерагӏча Паччахьалкхен филармоне артисташ, цар гойтар культуран ӏадатий оагӏув, хӏаьта къонача халхарчаша шоай говзал гойтар, цунца хьаьший гӏадбугаш.

«Библиобийса дӏаяхьаро цӏаькха а хьагойтар, библиотека тахан  - из хьаькъала кхуврч болга, хӏаьта къамаьл хотталуш йола дийна моттиг хиларо чӏоагӏбу бе-бе балхаш деш болча наьха доттагӏала бувзам.