- Мишта вӏашагӏабеллар оаш ганз хьакхоллара болх?

- Из гӏулакх хьаллоацараш дукха бар, хӏаьта из вӏаштӏахьадоаккхаш Налганаькъан Русланаца къахьийгар оаха. Соца болх беш вола, геттара гарга вола доттагӏа ва из. Морозовски берий клинически дарбанче дайзар тхо шиъ. Дукха ба цу хӏаман тӏехьа хиннараш, хӏаьта лораш-реаниматологаш хиларах тарра, хьалхалаьттараш тхо шиъ вар.

- Фуд шун балхаца керттердар?

- Эггара керттердар - Къилбаседа Кавказа дарбанчешкара хьал тоадар да тахан.

- Дикал яхар сенца юст оаш тахан?

- Дикал яхар, хьайна дезар наха а хилча ловш хилар да-кх! Хӏаьта оаха леладеча хӏаманца лоархӏамедар берашта паргӏатта, могаш болаш баха аьттув хилийтар да. Берий унахцӏенон хьалаца дувзаденнараш боаггӏаш болча боараме хьаллаца деза. Дикал яхар цхьаккха хӏаманца диста варгвоаца хӏама да.

- 2025-ча шера оагӏой бетта 225 000 000 гарга ахча гулде аьттув баьлар ганзе. Берий реанимацешта лаьрхӏа дукха ахчаш ӏодийхкар эзараш болча наха. Цу рузкъах фу де вӏаштӏехьадаьннад шун?

- Берашта дарба деча эшаш дола гӏирсаш эцаш болх ба, карарча хана дӏахьош. Цу тӏехьа къахьегаш да тхо, ма хулла сихагӏа кхоачам хьакхачийта гӏерташ. Хирургашта эшаш йола хӏамаш ийцай 1,5 млн сомах, реанимаце бадарашта кертаца эшаш дараш ийцад 1,42 млн сомах, токацара хирургически аппараташ - 1, 24, 964 эзар, 1, 605 млн сомах, ИВЛ аппараташ  - 2, 11 млн сомах, мониторашца эшараш - 466 эзар сомах, лорашта эшаш йола ши монитор - 319 эзар сомах, иштта реанимацена лаьрхӏа 12 маьнги. Хӏамаш тахан хьакхухьаш латт, цхьаццаяраш дӏаоттаяьй.

- Из беррига болх малагӏча оагӏонца чӏоагӏбаь ба?

- Ийца йола еррига хӏамаш «Адаб» яхача ганза тӏехьа чӏоагӏъяь я, кхоалагӏбарий доалахьа хулаш яц. Ерригача хӏамашта тӏахьожам хургба.

- Кердача гӏирсашца болх дӏахьоргбараш малашб? Хержабий оаш тахан царца болх дӏахьоргбола лораш?

- Лорий говзал дикка лакхъяра тӏехьа а къахьегаш я тахан ганз. Шоай болх дикка бовзаш бола лораш ба оаха тӏаозараш. Морозовски берий дарбанченца, иштта федеральни оагӏонцарча кхыйолча моттигашца бувзам лоаттабеш дӏахьош ба из болх. Кердача гӏирсашца болх бе ӏомабеш ба лораш.

- Тахан къахьегаш бола лораш юкъебоалабу аьлар ӏа, малагӏа болх дӏахьу цар цига тахан?

- «Адаб» ганз хьакхеллараш, лораш- реаниматологаш дакъа лоацаш ба эшаш йола хӏамаш хоржача, уж дӏаоттаеча, кхыбараш ӏомабеча.

- Чӏоагӏа тӏахьожам лоаттабе безаш болх ба из, сога хаьттача.

- Иштта долаш да-кх из… Ганзе лаьрххӏа тӏахьожама кхел я, деррига теркалдеш. Хӏара хӏама малагӏча наькъ тӏа дӏадодаш да хьожаш ба уж.

- Вай мехкарча цу оагӏонцарча министерствоцарча бувзамах дувцал.

- «Адаб» ганз дикка бувзам чӏоагӏбаь я унахцӏенон гӏулакхех йолча министерствоца. Иштта хилча дикагӏа дӏадода деррига.

- Къилбаседа Кавказера кхыйола реанимацеш кийчъе лерхӏий оаша иштта?

- Лерхӏ, даьра, тахан къахьегаш а да тхо цу оагӏонца. Рузкъа а Дала аьннадале тоъаргда тхона Къилбаседа Кавказа кхыча моттигашкара реанимацеш кхоачамца тоае. Ахча дӏахо а тоъаш хуле, СКФО арахьарча моттигашка а болх дӏахьоргба цу оагӏонца.

- Шамхан, чӏоагӏа беркате гӏулакх да тахан оаш дӏахьош латтар! Дала аьттув боаккхалба шун дага латташ дола дикаш кхоачашде! Беркате, иразе хилба цун никъ!