- ӏумар, мишта хержар ӏа из атта боаца болх?

- Из хержар са нана яр. Цунна чӏоагӏа ловра сох лор хилар.

-Мичахьа дийшар ӏа?

- Краснодарерча Кубански паччахьалкхен лорий университете дешаш хилар со.

- Шун цӏагӏа кхы бий лораш?

- Лорий гӏулакх хержа со мара вац тха дезале.

- Тахан хьадаьннача кердача гӏирсашца болх дӏабахьа малагӏа говзал хила еза?

- Укхаза лоархӏаме да деррига а, ма дарра аьлча. Лора говзал кӏоарга хила еза, цудухьа хӏара шера ший балхацара хӏама шаьрдеш къахьега деза лор хинна дӏаэттачо. Хӏаьта МРТ йоаккхаш вола лор-м, сога хаьттача, шера диазза из гӏулакх кӏоаргагӏа довзаш чакхвала веза, хӏана аьлча таханарча дийнахьа эггара чӏоагӏагӏа баржаш латта оагӏув ба из.

- МРТ малагӏа моттиг дӏалоацаш я лазар гучадаккхара тӏехьа?

- МРТ яхар чӏоагӏа лоархӏаме моттиг дӏалоацаш дола хӏама да таханарча вахаре. Моллагӏа лазар сага ший дегӏаца хоадала доладалалехь, цо хьагойт долчча тайпара сурт. Цӏийоацар оала, нервашта хула лазараш гучадахара тӏехьа геттара чӏоагӏа эшаш я из. Цхьабола унахой чӏоагӏа сагота болаш, хаттараш телаш хул, цо шоашта зе дар кхераш. Ма дарра аьлча, ионаш йола хӏама шийца цахиларах, увттаду кизга санна зене яц КТ. Цхьабараш шоай дегӏаца лазар дий хьажа чакхбоал, вӏалла саготдеш хӏама деце а.

- Хьога хаьттача, тахан вай мехка лакха начӏал дола лораш дукха бий?

- Вай республике шортта ба лакха говзал йола, шоай гӏулакхаца боккха лерхӏам бола лораш!

- Хьа балхаца эггара халагӏдар малагӏа да?

- Нахаца хӏара денна бувзаме хила, цхьаццадараш царна хьалхадаха атта дац! Къаьстта МРТ йоаккхаш вола лор, хӏара дош лорадеш хила веза. Сага дегӏа хьал гойташ дола каьхат ма дий оаха дӏалуш дар, массахана дагалоаттаде деза, цкъа ӏотӏадилла дош юхаэцалургдоацилга. Оалаш дола хӏама унахочо дикагӏа, аттагӏа дӏаэцаргдолча тайпара ала хьожаш хила веза лор. Хӏаьта эггара керттердар тха балха тӏа деррига а нийса, боаггӏача боараме чакхдаккхар, гӏалатвалар яха хӏама укхаза вӏалла товш дац!

- Тахан хьо хьегаш, сатувсаш хӏама дий?

- Сай болх кӏоаргга бовзаш хилар, лакха говзал йола лор хинна дӏачакхвалар да сона лоархӏаме. Сага гӏо дар, цун хьал аттачахьа даккхар Аллахӏа хьалхашка лоархӏаме гӏулакх ма дий; цунга хьежжа лора дезар, шийна могаш дола новкъостал деш, нахага хьажар да, Даьла раьза хилар да… Ше мел леладаьча гӏулакхех хоаттаргдолаш ма дий сагага, цунга хьежжа, кхоанарча вахаре накъадаргдар де хьажа веза.

- Вахаре накъадаргдола, пайдане хургдола гӏулакх харжа ловча къонабарашка фу аргдар ӏа тахан?

- Вай мехкарча къонача тӏехьенга аз аргдар да, эггара хьалхарча оагӏонца хӏама ӏомадеш, оашош шоашта денна дош дизза кхоачашдеш, дӏадаха хьажа деза шо. Халонех кхераш хила йиш яц, цхьан хӏаманга кхача гӏерташ вола саг, халонаш а шоай ханнахьа кхоачалу, керда наькъаш хьаделлалу, дикка къахьийгачунга хьежаш дукха хул. Моллагӏа дола хӏама вай динца дусташ дӏадаха деза, тӏаккха хургба аьттув а. Ший цӏи лорае еза сага, хьинаре деша деза, кхетам лакхбе безам болаш вале. Доккхий декхараш шийна хьалхашка оттадеш, уж кхоачашдара тӏехьа къахьегаш хила веза, диканга кхача гӏертар. Иштта да таханара дунен хӏама! Ший никъ цӏена; наха везийташ, Даьла раьза волаш; дӏабахьар эггара керттерча декхарех да.

- Баркал хилда хьона, ӏумар. Иразе, беркате хилба хьа вахара, къахьегама никъ. Аьттув болаш хилда хьа денош. Хьай дагалаттача дикашка кхача низ хилба хьа!