- Тхо даьхкад халача хана тхоай вошал дола къам хьаллаца. Хӏанз керттердар – сиха а ший доагӏача дӏакхоачаш а новкъостал дар. Тха бувзам ба моттигерча штабашца, хӏара сагага из новкъостал дӏакхачара бола бувзам лелабу», - аьлар Тенканаькъан Башира «Сердало» ше интервью луш. - Хой шоана, бӏаргашта хьалхашка отташ дар - из шоайла хьаллоацаш хилар да, - йоах тхоца къамаьл дечо. – Тайп-тайпарча моттигашкара нах, лоӏамхой, лакха балха говзал йола кӏалхарбоахараш… Уж берригаш, цхьа тоаба хинна, совлен дош доацаш болх беш ба. Цар ду юкъара гӏулакх: ӏойоассаеш, дӏа-юха хьожаеш, кӏалвисар хьаллоацаш.

- Моттигерча ӏаьдалца къамаьл хиларий шун? Мишта хет царна из хьал?

- Хилар. Тха вӏашагӏкхетар хилар Селий мехка Кулгалхочун гӏончаца. Тхо дика тӏаийцар, баркал аьлар, оаха дихьача новкъосталах. Эггара лоархӏамегӏдар - цар тхо, кхы ца гоадеш, даха дезача дӏахьожадир. Тхога аьлар столице мухь ӏобаккха безац, из дӏахо дӏабахьа беза- Хасавюрта кхале. Къаьстта цига хиннад дукхагӏа дола зе, цига эшаш да дукхагӏа новкъостал. Тхо бувзаме даьлар кхален кулгалхочунца, цо из иштта хилар чӏоагӏдир: «Тхо хьеж шуга».

- Махачкале вай кхыбола мехкахой бар йоахий?

- Из чӏоагӏа дика хӏама дар. Цига, МЧСа даькъ тӏа, тхона нийсбелар Гӏалгӏайчера вай кагий нах. Уж бар, Шолжа-Шахьара Цӏерца къовсам лоаттабара колледжа студенташ, хьехархо. Уж цига хьалхарча дийнахьа денз бар. Кхы из кхайка а ца деш, уж сиха вӏашагӏкхийтта дӏабахар вежарашта новкъостал де. Из бокъонца дола денал да. Уж цига гӏулакхах боахкаш бӏаргабайча, тхо геттара гӏаддахар, дӏахо Хасавюрта дӏадахар тхо.

- Мишта вӏашагӏбеллабар Хасавюрта из болх? Мичахьа дӏадахьийтар новкъостал?

- Тхо дӏакхаьчар кхален администраце, цига складе мухь ӏобаьккхар. Кхален кулгалхочо тхона хьалхадаьккхар де дезар. Из болх дика вӏашагӏбеллабар. ӏуйрийна склад хьалйиза яр, сайрийна из яьсса яр.

Хатар хиннача юрташкара викалаш хьа а баьхке, из мухь тӏа а бетте дӏаболх, цӏеннах чуотташ новкъостал ду хатар хиннача наха. Машинаш цаӏ, шоллагӏчун тӏехьа хьаухаш яр, новкъостал соцаш дацар. Цо тешал ду, нах шоай хатарца цхьаь буташ цахилара.

Гӏалгӏайче хьалхара яр цига новкъостал дахьийтар, бакъда цу тӏехьа из чакхдоалаш дац. Оаха дийцар Хасавюрта кулгалхошца даим бувзаме хургда, аьнна. Дӏахо эттача хьалага хьежжа новкъостал а лоаттадергда, из гӏулакх аттача даллалца. Иштта моттиг нийсъелча кхетаду, шоайла хьаллацар боарам боацаш долга.

Укх наькъа а, Гӏалгӏайчен президентски болама хьинардараша хьагойтар Кавказ барт, цхьоагӏо йолаш хилар. Гӏалгӏайче, Селий мохк даим хиннаб халача хана шоайла накъабоалаш, цхьа дезал санна отташ. Цун масалаш кӏезига дац. Гӏалгӏай къаманна цӏаккха а дицлургдац, 1992 шера гурахьа, Пригородни кхалера бехача гӏалгӏашта цигарча лораша даь новкъостал.