Лоархӏаме вахара проект
Гӏалгӏайче хьежар санаторно-хьун ишкол хьалъяра болх мишта дӏахьу
Гӏалгӏайчен Шолжа кхале дӏахьош ба вахара лоархӏаме моттигаш хьалъяра, цигара хьал миштад хара болх. Укх деношка, моттигерча парте отделене секретарь Йовлой Мухьмад шоашта кертте а волаш, единороссаш, иштта балха тоаба яхар цигара хьал довза. Гӏишлон майдан тӏа дӏахьоча санаторно-хьун даькъ тӏара ишкол хьалъяра балхага хьажа болх каст-каста Галашкара бахархой. Из объект лоархӏаме я региона, хӏана аьлча цох тийша да могашал тоаяр, дешара даькъ тӏара керттера декхараш кхоачашдар. Шоаш цига болаш, инспекце доакъашхой хьежар баьча балха дикалга, иштта гӏишло хьалъеш малагӏа материалаш дӏайохийт.
«Галашка, санаторно-хьун даькъ тӏара ишкол хьалъяр - из лоархӏаме моттиг я, даим парте а юкъарлоно а терко лоаттаеш а я. Тахан вайна гуш да укхаза болх дика дӏахьош, хьадаьр дикал йолаш хилар. Тха декхар да-гӏишло лакха дикал йолаш хьалъяра массайолча оагӏорахьара ӏалашо яр, йиллача хана из хьалъяь яккхар, кхерамзлен ӏалашо йолаш, дика хьалаш долаш, дешара моттиг хилийтар»,- аьлар «Сердало» газетага Йовлой Мухьмада.
Цига яха хиннача инспекце белгалдир, санаторно-хьун даькъ тӏа хьалъеш йола ишкол йиллача хана хьалъяь йоалаш хилар. Тӏахьожама болх дӏахьош, гуш дар болхлой тоабо ший гӏулакх дикал йолаш, ханашка диллача графиках дӏахьош хилар.
Хӏанз уж электромонтажни балхаш деш ба, гӏишлон арахьара кеп тоаеш ба. Укх ханага кхоачаш лоархӏаме балха дакъа чакхдаьннад: чура балхаш дерригаш даь даьннад, бӏарчча болх чакхбаьккхар котёл оттабеш, чура кирпишк юллаш, цо таро лургья ишкола йӏовхал лоаттае.
Проекта керттера белгало я, укх заман спортивни зал цу чу хилар. Из хьатӏаяьй, къаьстта ниӏ а йолаш, цу керттерча гӏишлон тӏа, цо таро лургья пайда болаш из гӏишло лелае.
Цу дерригача балхашца цхьана дӏаболабаьб гонахьара доазув тоадара болх. Говзанчаша хӏанз цхьа доазон дакъа тоадеш латт. Кастлуш укхаза хургья спортивни майда, дешархой таро хургья цӏенача фега спортивни хьалаш леладе.
Санаторно-хьун ишкол хургья даим юкъарлон, парте тӏахьожам болаш, из хьалъяь йистеяллалца.
«Из дувзаденна да берашца, цудухьа из цунга хьежжа лоархӏаме а да», - аьлар парте викалаша.
Юххера а, инспекце доакъашхой бахар Галашка, цига цар дӏадихьар «Герга истол». Цун доакъашхоша ше-ший даькъ тӏара хьал къоастадир - гӏишлон тӏера куц, спортивни майда сихагӏа хьаяр, чура балхаш дахар, инженерни балхаш вӏашагӏдохкар.
Гергача истола кепара дӏахьош долча къамаьло таро лу отчёташ чӏоагӏъе, иштта хьалхашка нийслуш дола хаттараш сиха кхоачашде. Дӏахо цхьана болх дӏабахьара хоадам болаш хаттараш хьакъоастадир, гӏишло шоаш аьннача хана йистеяккхар.
Галашка баха нах чӏоагӏа дезаш бар из гӏишло сихагӏа хьалъяь ялар. Цар белгалду, керда ишкол хьалъяро юртара вахара хьалаш а тоадергда.
