«Тӏехьарча шера, керттера терко тӀаяхийтар вахара даькъ тӀара хьал дегӀадоаладара, коммунальни боахам тоабара, юрташкара вахара хьалаш хьакхоллара, иштта доал деча даькъ тӀарча болхлой къахьегама овсарле лакхъяра.

МагӀалбикерча доал деча даькъа администраце дӀахо дӀахьу вахара-хьурмата доазув дегӀадоаладу Ӏалашо яра хӀара деннара болх, моттигерча наьха хаттараш дика кхоачаш а деш», - аьлар кхален администраце зарбан болх лелабераша.

Тӏеххьарча шерашка кхале белггала хувцаеннай, йоах, тхоца къамаьл деш хиннача администраце болхлочо. Кердадаьннача урамашка, юкъарлон доазонашка хьежача гуш да, дукха болх дӀабихьа хилар. Кхы а боккха болх ба дӀахьош, лоархӀаме да бахархошта вахара хьалаш хьакхоллаш, цу лостамагӏа лакха толамаш даьха хилар.

2019 шера денз, федеральни а моттигера а программанна чудоагӀаш, 12 юкъарлон доазув хьакхеллад. Из духхьал даьсса таьрахь дац. Цун тӀехьа эзараш къахьегама сахьаташ, лоархӀаме кхоачашдаь даьнна хаттараш да. Керттера дар да бахархошта керда вахара хьалаш хьакхоллаш хилар.

Кхоачашъяь яьннача проекташта юкъе кердадаьхад гӀашлой наькъаш, таханарча заман сердал, хоза тоаяьй салоӀаш йола моттигаш, майдаш, вахара даькъ тӀара гӏишлош.

Къаьстта ала безам ба наькъех. Моттигерча бюджета чотах ӏобиллаб километраш хургбола никъ, жагӏа-гӀум хьоарцаш, асфальт буллаш.

Таханарча заман вахар хьакхолла йиш яц, коммунальни оагӀув чу ца лоацаш. МагӀалбика кхале цу хаттара керттера терко лоаттаю. Цу тайпара инженерни гӏирсаш кердадаьхад, наьха вахаре а хувцамаш юкъедаьхад.

Тӏеххьарча хана кхале хьалъяьй 70 км совгӀа газаца ювзаенна моттигаш. Дика дегӀадоагӀаш да, долаш долча цӀеношта газ тӀехьара тӀа дӏахоттара хьалаш. Фусам- даьшта новкъостал ду каьхаташ вӀаштӀехьдаха, шоай доазон тӀа кхаччалца турбаш дӀатӏаяхьа.

Цунца цхьана кхоачашдеш да хицара дешаш а. Хий ца хилча, моллагӀа дола вахар а дика хьалаш да ала йиш йолаш хилац. Из тахан вай республике эггара ирагӀа латта хаттар да. Бакъда терко йоацаш из дитадац. МагӀалбика кхале дика дӀахьош ба къаьнара хин турбаш хувцара болх, цу даькъ тӀара готта моттигаш юстарйоахаш латт. Хьалхарча толамаша хьагойт из никъ нийса хержа хилар.

Итташ шерашка ца хувцаш лаьтта хин турбаш тиша я, кхы пайдана йоацача йоалаш латт. Из бахьан долаш турбаш лелхаш, хий Ӏоухаш моттигаш нийслу, тӀаккха хий дӀакъовла дезаш а хул. Къаьстта из нийсделча хало кхоач бахархошка ахкан зама йолаш.

Хицара хьал хувцар - из дукха ха а, ахчан таронаш а езаш болх ба, бакъда из тоа ца бича баргбоацаш а ба. Хӏара кердача турбай километр, хӀара керда насоса станци- из цахаддаш хий лоаттадара боаккхаш бола гӀа ба, цо тоаду вахара хьалаш. Юхедиса хаттараш доацаш, хӀанз даь даьнначун толамашка хьежача гуш да, даим дӀахьош болча балхо толам гойташ хилар, тӀаккха из да, керттердар - тешаме, цахаддаш наха хий лоаттадара хаттар кхоачашде йиш йолаш хилар.

Юрта бахача наьха вахара хьалаш тоадар - из керттера декхар да МагӀалбика кхален. Цу балха юкъе лоархӏаме дакъа дӀалоацар да вахара гӏишлош хьакхоллар. Тӏеххьарча шерашка лоархӀаме гӀа баьккхаб бахархошта таханарча заман, культурно-салоӀама урхалленаш хьакхоллара.

Кхален даькъ тӀа дика дегӀадоагӀаш да берий бешамаш, ишколаш хьалъяра гӏулакх, цар таханарча дено дӀадехар кхоачашду. Юкъейоалаяьй балха 9 керда ишкол, тайп-тайпара моттигаш йолаш (320, 540, 720 моттиг). Цо таро елар дешара моттигашка паргӀато е, кабинеташ, спортивни залаш а йолаш, дика хьалаш хьакхолла.

7 берий беш хьалъярах (120, 220 моттиг йолаш хӀараяр) таро елар берашта деша, хьехархошта, цу чу болх беш болча наха керда моттигаш хьакхолла, цунца цхьана берий даьй-ноаной таро хилар балха арабала.

Еррига керда гӏишлош хьалъяьй, ловза моттигаш йолаш, кхерамзлен ӏалашо, хоза тоадаь гонахьара доазонаш долаш.

Цунца цхьана дӀахьош ба йолаш йолча урхалленашка капитальни ремонт яра болх. Ишколашка кердаяьха классаш я, интерактивни гӏирсаш чулатташ, тоаяь спортивни, актови залаш, лорий кабинеташ, пандусаш, кхыйола таронаш йолаш.

Цӏенхаштта тоаеш я культуран моттигаш, цар чу хьакхоллаш да кружокашта, кхоллама студешта эшаш дола хьалаш. Цу тайпара, укх заман вахара хьалаш хьакхолларо таро лу бераш долча дезалашта, шоай цӀен гаьна а доацаш, берий начӀал дегӀадоаладе.

Цахаддаш вахара лоархӏаме гӏишлош дегӀайоалаяра болх дӀахьош хилча, моллагӀа йолча моттигах а доал дара даькъ тӀара доазув хьахул, цига атта да ваха, деша, бераш кхеде. Хӏара керда гӏишло - из кхален, цун бахархой хургдолчун юкъедена дакъа да, итташ шераш хьалха доазув дика дегӀадоаладара яь яьнна кӀийле а я из.