«Сердало» газете, «Гӏалгӏайче» яхача газета керттера редактор волаш, Халкъа Гуллама депутат, «Гӏалгӏай мотт» яхача республикерча оагӏон кулгал деш хьинаре къахьийгарех ва из. Таханарча дийнахьа ӏилма-тохкама институте литературан оагӏонна кулгал деш ва. Из тха библиотекан веза хьаьша ва, тхона юкъера бувзам чӏоагӏа ба. Цун кулгашка гӏолла чакхдаьннад оаха кепа теха ара мел доаккхаш дола хӏама. Моллагӏа гӏулакх цунна дӏатӏадилла йиш йолаш, тешаме саг волаш хьавоагӏа из»,- дийцар «Сердалога» библиотеке. Тахан цига хьабийлла гойтам цӏихезача мехкахочун кхоллама, къахьегама, вахара никъ бовзийташ ба. Хьинаре къахьегаш, тхьовра денз хьавоагӏача Хаважа денош даиман цхьацца хӏама тоадара тӏехьа дӏаухаш хиннилга гу вайна. Тайп-тайпарча оагӏонашка гӏолла довза йиш я цун балхаш. Масала, «Байтанча» яхача оагӏонца доаржадаьд цун байтий гулламаш.

Белгалде деза, цу сага мел яздаьр - из ший къаман визза воӏ волга хьагойташ долга. Къаман культураца, оамалашца, ӏадаташца, истореца, мехкарча хозача ӏаламца бувзам бола балхаш кӏезига дац цун. «Таржамхо» яхача оагӏонца хьокха оттадаьд гӏалгӏай, эрсий меттала цо даь таржамаш. Моллагӏа хӏама сага дег чу даргдолча тайпара духьалдá, доаржаде ховш литературан оагӏонцара говзанча ва ала йиш я цох тахан. Еша дог доагӏаш я цун байташ, ма дарра аьлча, байтанча нигат, уйлаш йовзийташ. «ӏилманхо» яхача оагӏонца цо даь тохкамаш гу вайна. Царга хьожаш, вай теркалду, Хаваж ший къаман исторех, цун кхоанарча вахарах дог лазаш, ший болча низаца цун хӏама хьаллаца ловш волга. Культуран оагӏонца дукха балхаш да цо даь, иштта къаман истори лорадара тӏехьа а. «ӏилман редактор» яхача оагӏонца цо ӏилман балхаш даь гуллам ба хьокха оттабаь. Монографеш, ӏилман йоазош, энциклопедически книжкаш, иштта кхыдараш довз вайна тахан. Къаьстта йоккха терко тӏаозаш да « Республикерча Къаман библиотекан редактор», «Исбахьален оагӏонцарча йоазоний редактор» яха оагӏонаш. Методически пособеш, библиографически балхаш, библиотечни каталогаш, иштта кхыдараш гу вайна уж оагӏонаш теркалдича. Таржамаш деча балхаца дикка белгалваьннарех ва Хаваж. 

Автора уйла ма ярра йоаржае, дешачунга дӏакхачийта ховш таржамхо ва оал цох тахан. Къаман библиотеко арахийца «Ноакастхой Хаваж - йоазонхо, критик, публицист» яха библиографически болх дукха хӏама довзийташ ба цун вахарера. «Гӏалгӏай литературах йола уйлаш» яхача книжкаца вайна хьагойт цо литературе ше воагӏаш нийсвенна, цун кӏоаргаленаш йовза, тахка низ, хьаькъал дола саг волга. Ноакастхой Хаваж халонех кхераш саг вац… Из иштта долга вайна гу цо мел даьчунга хьожаш, из деррига довзаш, хӏаьта литератора кхоачашде аьттув баьннараш тахан кӏезига дац. Гойтаме дакъа лаца денар дукха адам дар.

Эггара хьалха гучаяьлар цига дукха ха йоацаш ший 70 шу дизар дездеш хинна Дидиганаькъан Раиса. Хаважаца цхьана шоаш болх дӏахьош яьккхача ханацарча деноех дийцар цо гулбеннарашта, иштта белгалдир, Хаваж доккха хьинар долаш, кӏаьдвеннавар аьнна дог ца эккхаш, хьинаре къахьегаш хьавоагӏаш саг волга. Доккха баркал ала деза библиотека болхлошта а мехка цӏихезача, лоархӏамеча сага вахара, кхоллама никъ бовзийташ иштта къахьегарах, деррига а лакхача боараме кийчдарах.

Ишттача гойтаме ха дӏахьош, вай теркалду, къамах дог лазаш, ший Даьхе езаш къахьегаш волча сага вахара никъ цхьа ший тайпара белгала хулилга. Литературе лоархӏаме болхло хинна дӏачӏоагӏвала-м атта дац… Цу наькъ тӏа дӏатӏавалар-м цаӏ да, хӏаьта из никъ боаггӏача боараме хьаллоацаш дӏабахьа, ший мехка накъавоалаш, доккхий дикаш доаржадеш къахьега, литературан оагӏонца ше везавалийта хӏаране ка яргйолаш, низ, хьинар тоъаргдолаш хӏама дац.

Библиотека болхлоша из даькъалавувцаш долча каьхата тӏара дешаш да ераш : «Гӏалгӏай къаман визза воӏ ва хьо! Тахан юхахьежача гуш да ӏа хьай никъ лоархӏамеча балхашта тӏехьа къахьегаш хьабенилга. Баркал хилда хьона къаман литератураца, меттаца къахьегаш, цар хӏама тоадара тӏехьа латташ хьаварах. Дика, сийрда, цӏена дола гӏулакхаш доаржадеш хьавоагӏа хьо, массанена хье везавалийта ховш! Везача Аллахӏа могаш, маьрша волаш воахаволва хьо! Иразах, беркатах, хозача гӏулакхех дизза хилда хьа денош; барт, безам латталба хьа дезале!

«Сердало» газета редакце хьаллоац уж хоза дешаш! Хӏанз санна хьинар долаш, хьай никъ тахан санна безаш, лоархӏаш дӏаваха ираз хилда хьа! Хӏара ди Аллахӏа беркат дахьаш дайталда хьона! Тахан санна мел вовзарашта везаш вахалва хьо, дунен тӏа мел йоаккхача хана! Дикача, къаман беркате хургдолча хӏаман тӏехьа аьттув болаш вахалва, Хаваж!