Цига болх беш хиннача ханашка шийна байзача, боккъал беркате хиннача нахах дийцар къахьегама ветерана. «Белгалде деза, Шакренаькъан Аламбика, Леймой Рамзана цу заводе къахьегаш хиннача юкъа доккхий толамаш даьхалга, шоай болх боаггӏача боараме, тӏехдика кхоачашбе гӏерташ уж лаьтталга. Тахан хозача дешашца дагалаца безаш нах ба уж!

1946-ча шерара ва со-се. Дошлакъий-Юрта ва со тахан вахаш. 1962-ча шергара 1968-ча шерга кхаччалца Шолжа-Гӏалий тӏарча «Цӏе Жӏов» яхача массанена дика йовзаш хиннача заводе къахьийгад аз. Хӏаьта 1970-ча шергара 1992-ча шерга кхаччалца, Наьсарерча «Электроинструмент» яхача заводе къахьегаш хилар со. 6-ча боарама

(лабороторни, тӏахьожама-дистара гӏирсаш, автоматика) электрослесарь вар со. «Цӏе Жӏов» яхача заводе болх беш хилар Аламбик а, тӏаккха вай «Электроинструмент» яхача заводе Наьсаре инженер волаш къахьийгар цо. Афганистане тӏом лаьтта ха яр из. Дӏандаргашта лаьрхӏа гӏирсаш хьадора вай заводе. Шакренаькъан Аламбика, ший болх тӏехдика кхоачашбарах, «УАЗ» машин елар. Цу ханашка чӏоагӏа боккха толам бар из.

Цхьаькха цхьа хӏама дагадоагӏа сона… Вайцигарча заводе цхьа оатхал хьае вӏаштӏехьаялацар тха, тӏаккха Аламбика цхьан тӏема заводе хьожабир Маматенаькъан ӏумар, Пхьогоранаькъан Юсуф, Цхьорой Абу, Пхьугой Бек-хан, Дзармотанаькъан Муса. Юххера а, гӏулакх дикка тоаденна, тхоашта хьалхашка латта декхар кхоачашде аьттув баьлар тха, Даьла къахетамца. Цхьаькха а дар… бурош, хӏамаш иръю аьлхаш хьаеча стендаш эшар тхона, хӏаьта цар мах лакха бар. Езаш хинна стендаш итт яр, хӏаране мах 20-30 эзар сом бар.

Цу ханашка доккха ахча дар из. Шакренаькъан Аламбика, Москве ваха, меттадоаладир из хӏама. Вай заводе хьае доладелар тхо уж стендаш. Боккха болх бар цунна карагӏбаьннар, Даьла низаца. Цу ханашка Ереване арахецаш дар пешкий йӏовхал юсташ дола гӏирсаш, уж ӏалашдара болх а вӏаштӏехьабаьккхар цо. Со а хилар уж хьаэцача. Моллагӏа, хала бола болх аттачахьа боаккхаш чӏоагӏа къахьегар Аламбика. Цун дика аьттув боалар цу оагӏонцара гӏулакхаш тӏехдика чакхдаха. Вай завода цу хана дукха бурош арахецар. 30 совгӏа тайп-тайпарча паччахьалкхенашка дӏа-хьа дохьийтар уж. Завода тоаба бехктокхаме, ший гӏулакх лоархӏаш, дезаш къахьегаш хиннилга дар из.

Шакренаькъан Аламбик санна дикка белгалваьнна вар заводе Леймой Рамзан а. Советски Союза тайп-тайпарча моттигашка командировках дӏа-хьа ухаш, вай заводе эшаш хинна кхоачам ӏалашбе аьттув хулар цун. Моллагӏа керда болх дӏаболабеча, дакъа лоацаш хулар Рамзан. Цу заводах лаьца дола кино дайнад сона, бакъда, Аламбики Рамзани бовнзар сона цу юкъе. Цу наха кхоачашдаьр вай диц ца дича бакъахьа хетар сона; иштта бехктокхаме, тӏехдика шоай декхараш токхаш лаьттача болхлой цӏераш йовзаш хила еза.

Шакренаькъан Аламбик вайцара къаьста дикка ха я, хӏаьта Леймой Рамзан дӏаваьнна-м дукха ха яц. Аллахӏа гешт долда царна, ялсмален хьаьший болба царех шоаш Кхеллачо. Гуйран хьалхарча бетта 8-ча дийнахьа дездеш да машинаш вӏашагӏайохкачар Ди, цудухьа со а сихвелар царех язде. Цу наха хьинаре къахьийгар, доккхий дикаш доаржадеш. Массанена накъабоалаш, баьхар уж, шоай гӏулакх дика довзаш, вай къаман хӏамах дог лазаш бар. Вӏалла а йицъе йиш йоаца ханаш яр уж! Тахан уж беррига нах духьаллатт сона, дикача дешашца хьоахабе догдоагӏа», - дийцар журналисташка Маматенаькъан ӏалихана. Цу хана хиннача завода балхах дувцаш, ӏалихана хьоахадир, шоаш цига кӏа, хьажкӏа охьаш йола калхьар хьаяь хилар. 40 шу да йоха ца йохаш цо болх бу, цун латташ бола мотор Наьсаре хьабаь бар.

«Цу балха юкъе дакъа лоацаш бар вай кхалнах - заводера къахьегамхой. Тахана-м чӏоагӏа тамашийна хет из… Буроша болх мишта бу хьожаш, стендаш яр заводе. Цхьадола бурош 1000 000 хьалсегача а дикка болх дӏахьош хулар!» - дагаухар цунна. Шийца заводе болх беш хинна нах дега йӏовхалца, хозача дешашца дагалийцар цо, тхоца вагӏаш. «Шакренаькъан Аламбик чӏоагӏа хоза оамал йолаш, цхьа беркате саг вар. Шийна гонахьа мел хиннараш тӏехдика къахьега ӏомабора цо. Моллагӏа хӏама нийсделча, оарцагӏа сиха воагӏар, сага дӏаде новкъостал долаш вар. Дика адам долаш чакхваьлар Леймой Рамзан. Со цу заводе къона волаш хьавера болх бе.

Чӏоагӏа доаккхал дора аз иштта беркате, дика нах сайна бовзарах. Хана йӏоахалца бицбе йиш йоацаш, бицлургбоацаш нах бар уж; аьннача дош долаш, деналах, хьинарах бизза болаш, - белгалдир Маматенаькъан ӏалихана. -Тхона уллув къахьегаш лаьттар Исмейланаькъан Башир, Къоастой Ахьмад, Местой Хьусен, Къоастой ӏалихан, иштта кхыбола дика нах.

Вай къаман истореца лоархӏаме ха яр цар къахьийгар. Цу завода истори а ший къаьстта йоккха моттиг дӏалоацаш да вай мехка. Дуккхача наха керда никъ бийлла, дукха хӏама ӏомадаь, шаьрдаь моттиг яр из. Цох лаьца дувца эттача-м дукха да ала, дагадоха… Тахан вай дицдалийта, юстартатта йиш йоаца истори да из, хӏана аьлча, дерригача къаман вахаре лоархӏаме никъ дӏахьош хинна дукха къахьегамхой ба цу тӏехьа латтараш. Цига къахьийгача наха боча, еза, беркате ха яр из!»