«Тхона из доккха сий долаш да, тхоай музея даькъ тӏа цу тайпара начӏал долча наьха, суртанчий, Мержой йижарий кхоллам гойта йиш хилар.

Из гойтам - йижарий шоайла къамаьл хинна ӏац, из вай вошал долча республикашта юкъера культуран ӏадатий бувзам ба. Къаьстта мах болаш да, Мержой Лидифаи Ленаи керда кхолламхой кхебеш, цар безам искусствон тӏабохийташ бола хьехархой хилар. Цига хьажа баьхкача наьха а иштта искусствон безам тӏагӏоргба аьнна тешаш а ва со», - аьлар, ше цу гойтаме дакъа лоацаш хиннарашка моаршал хоатташ, Дербента музея-заповедника кулгалхочо Кулиев Вадима.

Цу проекта керттера маӏан да - цхьан тховна кӏалха, цхьан дезалерча Ӏадатех хьалкхийнача шин сага, шоайла тайп-тайпара маӏан долаш а техника йолаш а, кхоллама болх дӏахьош хилар.

Мержой Лидифа я Гӏалгӏайчен халкъа суртанча, моттигерча суртанчий Союза кулгалхочун гӏонча, Россе суртанчий Союза доакъашхо. Цо Наьсарен-Шахьара берий исбахьален ишкола кулгал ду итт шу совгӏа да, ший говзал къонача начӏал ярашта дӏалуш.

Мержой Лидифай кхоллам, дукхагӏа лирически хозала сурташ гойташ ба, царга гӏолла го йиш я Кавказа ӏалама куцаш, цо беш бола болх цу моттига къаьстта йола терко еш, ший тайпара хоза, боккха чулоацам болаш хул.

Лидифай исбахьаллен оагӏув белгалйоалаш я къаьстта из хиларца- цун сарташа тӏахьех уйла яра, сатем а духлохама сабар а хилара.

Мержой Лена – Магӏалбик-Шахьара берий исбахьаллен ишкола хьехархо я. Цун балхаш да Россе, Европан коллекцешка, искусство йовзарий теркам тӏаозаш. Ше ӏомаеннача суртанчан кхоллам ба сийрда, вахара хозагӏа йола оагӏонаш гойташ, ший тайпара йоазон каьхат долаш санна да цун сурташ, царна юкъедоагӏаш хул дукхагӀча даькъе ӏалама безаме хьал, безам, зизай хозал, кхаьчача сомий чам.

Ленай сурташка вахарера хьинар хул, цо из гойташ хул, хӏара сага терко тӀаозаш.

Мержой йижарий гойтам хьабеллар, Дербента культуран кхетачен оагӀув хинна ӏацар, из берригача Селий мехка сийлен кхетаченах тара яр. Цига хилар кхоллама интеллигенце викалаш, музея-заповедника болхлой, моттигерча исбахьален ишкола хьехархой, дешархой.

Къонача суртанчашта из йоккха таро яр, тайп-тайпара бола кхоллам го, иштта говзанчий техника ӏомае, царгара масала эца. «Кхоллама пхьоалле» - из цӏаькха а тешал деш йола моттиг я боккъонца йолча искусствон мах бараш вӏашагӏтохаш хиларал совгӀа, дог айдолийташ, хӀара саг хувцаволийташ дола дика ди хилара.

Гойтамо ший болх дӏахохьоргба, 2026 шера наджгоанцхой бетта 20-ча денга кхаччалца; Мержой йижарий кхолламга кхача, иштта шоашта хьалхашка таханарча заман исбахьален говзала таронаш йовза наха аьттув луш.