Электронни оала гӏаьленаш увзар дегӏа чӏоагӏа кхераме хиларах хоам беш ба лораш
Къона волаш дог даттӏара (инфаркт) бахьан хила йиш я электронни оала, тахан яьржа гӏаьленаш. Унахцӏенон гӏулакхех йолча Министерствос бу из хоам, ший телеграм-оагӏонга гӏолла. Уж дегӏа зе деш яц аьнна арадаьнна къамаьл харц, цхьаккха бух боацаш, уж хьахийцараша шоашта болча пайданна доаржадаь долгах дувц лораша. Унахцӏено толхаеш йолча цхьан хӏаман когаметта, таханарча ханага хьежжа, бӏарг тӏаотташ хоза тоадаьча каьхата юкъеделла арахийца дохьаж да ала йиш я цох.
«Тахан вай лораш чӏоагӏа сатем байна ба, кагирхошта юкъе дега лазараш ма даггара даржаш латт, яхаш. Дега тайп-тайпара лазараш хьатӏадувлаш кардиологе ӏочукхувлараш дукхагӏа, 35 шерга кхачанза кагирхой ба. Миокарда ищеми яха, тахан царна юкъе даьржа лазар хӏанзолца ха яхача наьха лазар лоархӏаш дар», - йоах цу хоама тӏа. Мехкарча РКБ лораша белгалдечох, укх тӏехьарча бетташка 25 шераш даьннарашта а тӏехьа инфаркт хулаш нийсденнад.
Анализаша хьагойт, уж беррига кагирхой хӏара денна электронни оала гӏаьленаш увзаш хиннилга. Лораша ма даггара кхайкарал ду тахан, кхыйолча гӏаьленашта когаметта ма даггара йоаржаеш латта вейпаш доккха зе деш я яхаш. Уж увзаш вола саг хала лазар хьатӏадаьнна валар кхерам болаш да.
Кардиологаша хьадувц, цу гӏаьленех геттара лакха никотин, пропиленгликоль, глицерин, иштта кхыбола зе деш бола кхоачам боалл, яхаш. Цу хӏамаша дегага боаггӏача боараме болх хьабайтац, дега боккха низ бу.
Массайолча паччахьалкхен моттигашка гӏолла, цӏагӏарча даьша, ноаноша, дешара моттигашка ма даггара дӏадувца дезаш хӏама дар цар дегӏа могашал эшаелга, саг царех вала йиш йолга.
