Яндарерча культуран Цӏагӏа дӏайихьар, «Лорабе вай мотт» яха кхетаче
Яндарерча культуран Цӏагӏа дӏайихьар, «Лорабе вай мотт» яха лоархӏаме кхетаче. Къамий метташ лорадара тӏехьа йолча программага гӏолла, дӏахьош болх бар из. Къонача тӏехьен дегашка наьна меттацара безам чӏоагӏбеш, кхетаче хилар цох.
«Кхетачен кулгал деш хиннар яр культуран Цӏен исбахьален оагӏонцара кулгалхо Йовлой Мадина. Берашта цо дийцар, наьна метта сий де дезилга, цӏагӏа, ара моллагӏа саг ший къаман мотт лебеш, цун моттиг лораеш хила везилга. Кхетаче иштта теркалдир, дунен тӏа цхьаццадолча къамий метташ дайна дӏадаьннилга, уж шоай мотт бувцаш, лорабеш, боаржабеш цахиларах», - дийцар «Сердалога» кхетачен кулгалхоша.
Йовлой Мадинас белгалдир, хӏара сага вахаре Дала цун хьакхоллаш бенна мотт боча, хьамсара хила безилга, моллагӏча метта хӏама, цун сий деш ца хилча, эшалулга. Гӏалгӏай мотт тхьоврача халача ханашка денз лорабеш, ца байта гӏерташ, хьабенаб вай даьша, иштта лакха лоархӏам беш дӏадаха деза вай а, наьна метта моттиг эггара лакхе лоаттаеш. Къаман меттаца дувзаденна да цун ӏадаташ, оамалаш, истори, культура.
Белгалде деза, иштта йолча кхетаченашка гӏолла, бераша дукха хӏама ӏомаделга, царех боккха пайда хулилга. Метта хьал тоадара болх, вай массане хьаллоацаш, дӏабахьа безарех ба.
