Гӏалгӏайчен Миннаца Халкъашта юкъера кхетаче дӏахьоргья, Кавказе лаьттача тӏема хетаяь
Гӏалгӏайчен Миннаца дӏахьоргья «Кавказе лаьттача тӏем тӏа моастагӏчунна духьалъэттача Россе къамаша юкъедена дакъа» яха Халкъашта юкъера кхетаче, яхаш, дийцар «Сердало» газетага цу боахама зарбан болх лелабераша.
«Кхетаче лаьрхӏа я исторически бакъдар лорадара, истори хувца гӏертарашта духьале яра, эзараш болча Кавказ лораеш лийгача советски салтий, эпсарий дагалоаттам лелабара», - аьлар министра Мизенаькъан Руслана.
Из лоархӏаме кхетаче дӏахьоргья халкъа цхьоагӏон Шу долаш, из хургья РФ тайп-тайпарча моттигашкарча историкий, тохкамхой, ӏилман юкъарлоний викалий къамаьлашка керте латташ.
Йоккхача кхетачен керттера тема - эггара дукхагӏа лаьттача Сийлахь-боккхача тӏема юкъе хувцамаш даьха хилар, турпала майралца Магӏалбик-Шахьар лораяр. Къаьстта укхаза, гӏалгӏай лаьтта юхасоцабир моастагӏчун бӏу, из гӏертар фуннагӏа даь а Кавказа мехкадаьттанна тӏакхача.
Цхьана болх дӏахьош, доакъашхоша дувцаргда кӏезига йовзаш йолча исторе оагӏонех. Белггала йола моттиг цига дӏалоацаргья вай боккхача мехка дахача, шоай Даьхен кортамукъале йоаккхаш эттача къамий цхьоагӏо хиларо.
Дукхача къамий викалаш денал долаш лаьттар, Магӏалбик лораеш сихбенна бодача къизача тӏема мугӏарашка. ӏилманхоша гойтаргда турпалхоех дола керда хоамаш, царна юкъе цӏихеза актёр Этуш Владимир а волаш. Цо тӏом баьб цу моттигашка, из ва Магӏалбика Сийдола саг.
Иштта цига хиннав къона разведчик Мордвинов Володя, из велар ший тӏема декхар кхоачашдеш. Царца хьоахабе боагӏа йоазонхой-тӏемхой, поэташ Цирульников Лев, Владимов Михаил; турпалхо-тӏемхо Еремеев Павел («Денал гойтарах» майдилг елар цунна Магӏалбика юхе лаьттача тӀем тӀа), лоӀамхо Яхьяевгӏар Мухьмад.
Бокъонца бола турпалхой дагалоаттабар - Россе хӀара вахархочун декхар. Сийлахь-боккха тӀом лаьттача шерашка, вай мехкара къамаш цаӀ санна боккхача низаца оттарах, вохавир моастагӀа.
