Гӏалгӏайчен дешархой ӏомабу. воча наькъашта духьаллатта
Алхастерча культуран цӏагӏа дӏайихьар «Цхьана - терроризма духьала» яха кхетаче. Цига дийца керттера дош дар, кхувш йоагӏача тӏехьенна вахара нийса никъ хьехар, цар сакхетам лакхбар, уж зуламаш деча нахах дӏа ца кхетийтар.
«Кхетаче дӏахьош хиннача Загӏенаькъан Адама дӏадоладир къамаьл, цо белгалдир, терроризм укх заман эггара чӏоагӏагӏа бола кхерам хилар. Цо керттера терко тӏаяхийтар, кагирхой шоай хьинар хилар а, кердадар довза безам болаш хилар а бахьан долаш, каст-каста экстремизма юкъе нийслуш хиларах», - аьлар «Сердало» газетага кхетаче вӏашагӏъеллараша.
Кхетаченна чудоагӏаш, доакъашхошта дагадехар тӏехьарча хана терроризмах хьадаьнна доккхий зуламаш. Керттера терко тӏаяхийтар зуламах лоравалара оагӏонна: мишта довзаргда къайлагӏа деш дола зулам, мишта лоравала йиш я цунна юкъе ца водаш? Дика пайда хилар, «Россе терроризм» яхача документальни фильмага хьажарах. Цига къаьгга гуш дар хӏара гражданина сакхетам лакха хила безилга.
Кхетаче чакхйоалаш берашта вахаре накъадаргдола хьехамаш дир, хоамий кхерамзле хургйолаш. Из болх вӏашагӏбеллараша дийцар, мишта довза йиш я Интернетага гӏолла саг харцахьарча наькъ тӏа ваккхара деш дар, цу тайпарча вахара бувзамашка лелача юкъарлонах мишта лоравала веза.
