Москверча ГӏалгӀайчен викала фусаме, дувцаргда таханарча дешара хьал
Тахан, пӀаьраска дийнахьа, Москверча ГӏалгӀайчен викала балха новкъосташа дӀахьоргда герга истол, из дӀахьу искусственни технологеш юкъейоахаш, дешара хьал кердадоаккхаш хиларца дувзаденна. Из хаттар тахан ира латташ хилар дувзаденна да ИИ-балха хьал массайолча оагӀонашка юкъедоаккхаш хиларца. Дешара даькъ тӀара болх бувзабенна ба керда дешара таронаш йовза езаш хиларца - професси хувцаш, болх лоаттаберий дӀадехар хувцалуш, иштта дешара Ӏадатий оагӀонаш хувцалуш йоагӀаш хиларах.
«Цига хьаьший болаш къамаьл дергда Плюснин Павела- ИИ-оагӀон кулгалхочо, цо цу даькъ тӀа болх бу дукха ха я, из ва тохкамхо, мехка технически вузашта юкъе цаӀ дикагӀчарех лоархӀача вуза хьехархо, тахан лелаеча бизнеса йоккхача ИИ-оагӀон балха даькъ тӀа болх баь саг.
Иштта цига къамаьл дергда Закрия Арона - из ва предприниматель, хьехархо, МГУ классически дешара оагӀув ший балхаца цхьана лелаеш, цунца цхьана хьакхоллаш таьрахьий даькъ тӀа дукха дешара моттигаш», - аьлар «Сердало» газетага ГӏалгӀайчен массазарча викала болхлоша. Гергача истола доакъашхоша дувцаргда, ИИ-кердадарех тахан рынка хьалашка дӀадехараш фуд, мишта хувц искусственни интеллекта дешара хьал, иштта дешархошта, хьехархошта юкъерча дешара мах оттабарах.
Цул совгӏа, тохкаргда дешара программаш сихагӀа хувцара дола хаттараш, дешара болх лакхагӀча боарам тӀа оттабара искусственни интеллект лелаярах.
