ГӏалгӀайчен Москверча лорашта, паччахьалкхен совгӀаташ делар
ГӏалгӀайчен массазарча Москверча викала фусаме, баркал аьлар мехкахошта-лорашта, цар хӀара дийнахьа лакха профессиональни говзал йолаш, шоаш хержача гӀулакха мутӀахьа болаш, столицерча хьалхале лелаеча моттигашка из болх дӀабахьарах. Цу балха даькъ тӀа дукха къахьегарашта, лоархӀаме толамаш даьхарашта, профессионализм гойташ, лорий гӀулакх дика довзаш, гойташ хьабоагӀача лорашта ГӏалгӀай Республикан паччахьалкхен совгӀаташ делар.
«ГӏалгӀайчен Кулгалхочун Келаматанаькъан Махьмуд-Ӏаьлан амарах «ГӏалгӀайчен цӏихеза лор» яха сийлен цӀи елар, гемотологе къаман лорий тохкама центра лора- травматолога-ортопеда Сампенаькъан М.С., Москверча С.П. Боткина цӀерагӀча дукхача оагӀоний Ӏилман-клинически центра хирурга-онколога Султиганаькъан А.Х., гематологе къаман лорий тохкама центра стволовой клеткашца Ӏалашо яра отделене заведующи йолча Ноакастхой И.М., Москверча С.П. Боткина цӀерагӀча дукхача оагӀоний Ӏилман-клинически центра кулгалхочун хьалхарча заместитела Багателия З.А., Москверча, С.П. Боткина цӀерагӀча дукхача оагӀоний Ӏилман-клинически центра, экстракорпоральни тайпара (эко) дарба дара анестезиологе Центра отделене заведующена Цӏолой А.Х.», - аьлар «Сердало» газетага совгӏаташ дӏаденнача моттигера.
Цу кхетачене дакъа лоацаш хилар Паччахьалкхен Думан депутат Татренаькъан Муслим, сенатор Илезанаькъан Микаил.
СовгӀаташ даларо хьагойтар лорацара лерхӀам, цар хӀара денна атта доацача балха даькъ тӀа къахьегаш, шоай профессиональни декхар кхоачашдеш хилара мах а оттабир.
ӏКхетаче дӀахьош дукха баркал оалаш дешаш аьлар лорашта, лорий йижарашта, фельдшерашта, кхыча говзанчашта, цар къахьегам – къаман могашала кӀийле. Хьалхале лелаю лорий технологеш юкъеяхарах, къона лораш Ӏоамабеш, Даьхен дарбанчен дикагӀа дола Ӏадаташ леладеш, лораша деш дола дарба белгалдир, царна къаьстта баркал аьлар.
