Къонача эскархоша шоай кердача шерара совгӏаташ СВО бӏухошта дIадала лаьрхӏар
Гӏалгӏайчен столицерча лицея къонача эскархоша шоай кердача шерара совгӏаташ дIадала лаьрхӏар СВО бӏухошта. Цу гӏулакха лаьрхӏа уж баьхкар Халкъа фронта моттигерча исполкоме. Мерзача даарел совгӏа, бераша ера шоай кулгашца хьаяь хӏамаш; иштта каьхаташ яздир, бӏухой сихагӏа, маьрша цӏаберзар ловш бола ловца боаккхаш.
«Нийса доаца мугӏараш, берий сурташ, дег чура доагӏа дешаш - массаза санна доацаш, кӏаьда дар: «Тхо хьежаш да шуга», «Лоралуш хилалаш», «Баркал шоана тхо лорадарах». Из чӏоагӏа дог хьоасташ дар.
Берашца вӏашагӏкхетар хилар Хаматхананаькъан Ювсупа, из цӏавенавар итта ди даккха.
Бӏухочо дӏайихьар бераша шоай кулгашца хьаяь хӏамаш, бакъда мерзача хӏамай совгӏаташ цо цхьаккха дича дӏадахьа тиганзар. Цо шийгара хьаденнадар царна мерзача хӏамай совгӏаташ. Из санна йолча моттиге дика кхетаду: мехка низ - герзаца хинна ӏац. Из ба шоай бӏухошца деррига декъа кийча долча берий кулгашца»,- аьлар «Сердало» газетага Гӏалгӏайчен Халкъа фронте.
Доккхийча гӏулакхех боахккашехь а, цхьайолча хана боккхагӏчарна дицлу; укх дунен тӏара эггара безагIа мах бар берий дегай йӏовхал йолга. Из ба, юхадехаш хӏама а доацаш, дег чура боагӏаш бола безам, цо дог гӏоздоаккхаргда хӏанз гаьна болча тӏема мугӏарашка латтача вай бӏухой.
Бераш ховш хилац доацар ала. Цар хьаллацар - из дег чура доагIаш да. Нийса доацача мугӏарашца яздаь каьхаташ, сийрда сурташ, чоалхане йоаца, бакъда боккъонца йола йӏовхал я из. Хӏара бера йоазон юкъе да: «Со тешаш ва хьох. Аз доаккхал ду хьох. Цӏавола».
