Кхерамеча фашкаргех лоравалар
Фашкаргех лораваларах бола берий лора-инфекциониста хьехам ба ер. Ара йӏовхал эттача, фашкаргаш корзагӏйоал, уж унзара я берашта, боккхийчарна. Берий лора-инфекциониста Овшанаькъан Мухьмада дийцар мишта лоравала веза лазараш дӏа-юха кхухьаргдоацаш.
- Мухьмад, малагӏа лазараш да фашкаргаша дӏа-юха кхухьараш?
- Фашкаргаш унзара лазараш доаржадеш я, царна юкъе дукхагӏа нийслуш да:
Боррелиоз: бактериальни инфекци, цох цӏока тӏа хӏамаш тӏатох, дегӏа шелал тӏайоагӏаш, корта лазаш, кӏаьдвеле хул. Цунна дарба деш ца хилча, дегӏа хьал чоалханедерз, неврологеца е дегаца дувзаденна лазараш кхет.
Эрлихиоз: из лазар хул Ehrlichia бактерешца дувзаденна. Корта лазаш, лакха йӏовхал йолаш, ӏетто дог керчадеш. Из хала лазар да, дарбанче ваха везаш.
Анаплазмоз: из а да бактериальни лазар, из тара да эрлихиоза. Ший ханнахьа дарба дезаш да, корта лазаш, ӏеттадеш, кхетам чура воалаш хул из лазар кхийтача, кхыметтел дегӏ а лелаш хилац.
Уж лазараш дий ховш хилац иштта сиха, цхьа кӏира даьлча мара ховш хилац из кхийттадий.
- Мишта лоравергва ше а бераш а фашкаргех?
- Цу хьакъехьа массехк хьехам бергба аз. Нийса дувха деза барзкъа. Из хила деза сийрда; кулгаш, когаш къайладоахаш. Цо таро лу лелаш йола фашкарг сихагӏа бӏаргаго. Хаче гоазаш пазаташ чу ӏочудохка деза. Керта тӏа хӏама туллаш хила веза саг.
Лаьрххӏа йола фашкаргех лораву молха лелае еза. Дегӏах, иштта йийлла моттиг йолча хьакха еза из.
Каст-каста лакхъенна буц дӏахьокхаш къахьега деза.
Ара хинна чувеначул тӏехьагӏа, хьажа веза шийх чоапилг летайий. Дукха кхотаенна буц йолча юкъе чу ма дувла, хьун наькъашка ма лела. Цар хьакхолл во хьалаш.
Энцефалита духьала маьхий тоха йиш я. Республике цу лазара духьала маьхий тоха деза. Лорашца дагабала а беза нах.
Уж моттигаш лораеш хилча, таро хургья из унзара лазар ца лаца.
