Цхьаькха селинг дӀаяздергда, ГӏалгӀайчен культуран тӀехьале санна
Жӏайрахьа-Ахабоарзен музея-заповедника болхлой баха хилар дӀалархӀанза йола культурни тӀехьален гӀишлош йий хьажа, уж дӀаязъе Бешт яхача гӀалаш ягӀача моттиге. Цу доазон тӀа йиъ гӀала яьгӀа хилар гуш да, уж нах чубахаш йола гӀалаш хиннай, царна гаьна йоацаш Даьла хьоахавеш йола моттиг хиннай, яхаш, хоам бу «Сердало» газетага музея-заповедника зарбан болх лелабераша.
«Из я 2,50 м лакха, 1,10 м йӀаьха,065 м шера. Этнографаша яхачо вайна довзийт чӀоагӀача кхерах даь селингаш оала элгацаш; цар тешал ду маьлха а тӀоа сегара а Даьла хиннача Селацарча мифически бувзамашта. Цу тайпарча селингий масалаш да лоаман ГӀалгӀайчен Аьрзе, Аьга-Кхале, Тӏаргиме, Ний, ВӀовнашке, Оздече, иштта кхычахьа дагӀараш.
Тохкамхочо Къоастой Ф.М. лоархӀ, дӀаяхача заман наха «силинг» яха дош биъ са бола, малхбоале берзабаь латта кхерах баь бӀоагӀа белгалбеш оалаш хиннад, из хиннаб шин оагӀорахьа чухьекха, е цхьа шаьра тхов тилла. Селингаш даь хиннад сага лакхал долаш, хьекха боацача кхерах, топпарца е кӀираца баьча маркхалца чӀоагӀбаь. Цу тайпарча кхерах даь селингаш хьалдеш хиннад наькъаш вӀашагӀкхетача, гӀалаш йолча е малхара кашамаш долча.
Цу гӀишлох лаьца даь йоазонаш тхона кораданзар. Тха болхлоша, из моттиг юсташ, сурташ доахаш, бе-бе бустамаш доахаш, болх дӀабихьар. Из селинг чудоагӀаш хургда республикан культуран гӀишлошта, иштта Ӏилман балха юкъе а хьоргда из, ГӏалгӀайчен истори мел дезарашта эшаш а хургда», - аьлар Жӏайрахьа-Ахабоарзен музее-заповеднике.
