Кисловодскерча яхьашкара дошо майдилг яхьаш цӏавера Осменаькъан Мансур
05.12.2025 11:06
Долакха-Юртарча Осменаькъан Мансура дошо майдилг яьккхар, Кисловодске хиннача ерригача Россе яхье. Из хоам «Сердалога» бир спортсмена тренераша.
«Укх бетта 3-ча дийнахьа дӏайихьача яхьашка дакъа лоацаш бар 16 шерга кхачанза бола спортсменаш. Долакха-Юртарча спорта ишколе кхеваь Мансур дикка белгалваьлар йоккхача турнире. Россе спорта говзанча боарам кхоачашбеш, 62 кг болча латархошта юкъе котало яьккхар цо. Гаркхой Шамал вар цунна хьехаш хинна тренер», - йоах тхогарча хоамо.
2026-ча шерарча саькура бетта Каспийске дӏахьоргйолча Россе яхьашка дакъа лаца аьттув хилар вай мехкахочун, из котало бахьан долаш.
