Халкъа вахар дувца книжка
«Боадонгара» яха роман яздаь 55 шу дизад
Вайна массанена дика довзаш да Боазаркъанаькъан Идриса «Боадонгара» яха роман, цу тӀа болх баь ваьннав йоазанхо 1967 шера, вешта аьлча нийсса 55 шу хьалха. ГӀалгӀай лоамашкара арабалале цар кхел мишта хиннай дика гу вайна вежарий Турсеи Гаракхеи вахарах. Уж аькхе мишта ихаб, дезал кхаба гӀерташ; цар кхаш мел биркъе хиннад, дӀадийна хӀама догӀа дийлхача догӀо, тӀаенача Ӏимо Ӏо мишта кхихьад, бӀаьхийча наха ГӀойтамара, Чаборза царца мишта къийсад, кхы а массагӀа да цу йоазонга гӀолла вайна довзар. Къаьстта а дог тохадолийташ да, дукха веза ши воша вӀаший къастар, царех цаӀ туркий мехка ваха дӀавахар, ший воӀ, хӀаьтта Ӏодаь бер, вешийна а вита.
Дуккхача наха хестадаьд из книжка. «Сердало» газета редакце балха волаш, театровед хиннача Абаьданаькъан Бека из нийсдеш хезад цона Толстойс яздаьча «Война а мир» яхача романаца. ХӀаьта профессора. филологически Ӏилмай кандидата Дахкилганаькъан ИбрахӀима яздаьд: «...И. Базоркин, бокъонца вола йоазанхо ше хиларца, нийсача наькъах гӀоргвацар хьалхарча замах хинна хӀамаш критически дийца а дийца Ӏийнаваларе. Йоазанхочо, ший роман дегӀайоалаеш, массахана терко ю вахар овлангара хувца дезаш хилара. Цудухьа мегад йоазанхочоа вахар диалектически дегӀаахар хьокха, халкъа революционни кхетам дегӀаухаш дӀаоттар дувца. «Боадонгара» яхача романо гӀалгӀай литература дегӀаахара боккха мул баьккхаб...»
Ховш ма хиллара йоазон керттера турпал Коло ва. Цун сурт-сибат тардаь да «Колой КӀанти Сеска Солсеи», «Колой КӀант» яхача оаламашка вувцача турпала сурт-сибатах. Вешта аьлча. цун кӀийленга уллар багахбувцама сюжет я. Цунгара хьаийцай Идриса кхеллача Колочо ший низ, эздел, денал, майрал яхараш санна йола оамалаш. Цул совгӀа, Зорацара безама моттигаш а цхьадолча даькъе тара хеталу Сеска Солса йишийца Колой КӀанта лаьцача гӀулакхах, леладаьча эзделах.
Таханарча дийнахьа роман ший лоархӀам бовнза да, хӀаьта а цхьацца моттигаш цу тӀа хиннаецаре а мегаргьяр аьнна хеталу, масала, Колочо Насеца лелаяь хьарамленаш, молла леладаь бусалба дино мога ца ду хӀамаш, иштта кхыдараш.
Роман духхьал книжка мужалта кӀалха даьха ца Ӏеш, иштта театра сцена тӀа а даьннад. «Заманхо» яхача театра актёраша дийнбаьб цун турпалаш, шоаш оттаяьча спектаклаца. Дувцаш дола книжка цкъа арадаьнна Ӏийнадац. Политолога, йоазанхочо. журналиста Патанаькъан Йоакъапа яхачох «1968 шера денз 9 арадаьннад из». Хетаргахьа, цул дукхагӀа арадийнна а, цунъяр миссел тираж хинна а вай литературан юкъе книжка дале тамаш я. Цох а ха йиш я, из мел дезаш, наха хетташ книжка да. Сона дуккхаза байнаб, республикал арахьа дӀабахалехь, из книжка лехаш хинна нах. Шоаш болхаш йолча моттиге бахаш болча кхыча къамех болча наха совгӀата дала дезар царна из.
Ала деза, со деша ваьгӀача шерашка а, романа тӀара дакъа школе Ӏомадеш хиннилга, цунна таржам даьр вар Дахкилганаькъан ИбрахӀим. Из таржам дика даь а наха дезалуш а дар.
