ШозлагӀа-дале, Ӏаьдала а дикка гӀо дора цар, эшаш бола къахьегамхой кийчбеш, уж балха дӀанийсбеш. Укх шера сентябрь бетта денз, ший наӀараш хьаелларгья Наьсаре хьаяьча кердача колледжо. Цун директора Шоанахой Тухана ИбрахӀима яхачох, из я Къилбаседа Кавказа бе-беча къахьегама доакъошта эшаш бола болхлой кийчбергбола колледж. ГӀалгӀай республикан министерствон лицензех хьаяь, дешара керда фусам я из. Из хьае дагадехар Тухана ИбрахӀим ше ва. Шийна дага мел доагӀача хана, бокъонаш лораеча органашка къахьегаш хиннав из, 1979-ча шерагара дӀаволавенна, 2020-ча шерга кхаччалца. Вешта аьлча, 31 шера МВД мугӀарашка волаш хьавенав вай мехкахо. Министра заместитель, следственни урхаллен кулгалхо а хиннав.

ТӀеххьарча 20 шера полковника сийдола цӀи лелаеш а ва. 2007 шера денз, юридически Ӏилмай кандидат ва колледжа кулгалхо. Хьехархочун болх а баьб цо цул тӀехьагӀа 7-8 шера, экономикаи бокъони институте, университете. Иштта болх баьб парламента аппарата кулгалхочун заместитель волаш. ИбрахӀим воккха вац, цун хӀанз 65 шу мара даьннадац. Ше могаш волча хана, болх булуча хана, кагирхошта вахаре шоай моттиг хьалаца гӀо де лаьрхӀад цо. Тайп-тайпарча къахьегама доакъошта хетаяь колледж цох алар бахьан да, цунна чуйоагӀаш массехк отделени хилар: стоматологи, фармацея, медйижарий, юриспруденци, бухучёт, деша дахалехь берашта хьехар, юххьанцарча классашка хьехар.

ХӀанз а дешархой хьаийбеш бола болх чакхбаьннабац цига. Колледжа филиал хургья МагӀалбике. Наьсаре 300 саги МагӀалбике 160 саги деша хьаэца лерхӀ цар. Хьехархой 20 саг хургва. уж яхь дӀакхайкаяь, дикагӀвар къоаставеш, хьаэцаш ба. Царех цхьабараш хӀанз а хьехархой болх беш ба кхыча моттигашка. Уж дукхагӀча даькъе школашка, университете, медколледже, кхыча колледжашка къахьегаш ба. Царна юкъе йоазанхой а ба, масала, ТӀой-Юртара Дударанаькъан Макка. Из эрсий мотти литературеи хьехаш хургья. Иштта йоккха поалхам йолаш, дуккхача хана Наьсарерча № 1 йолча юкъерча школан директор а хинна, саг я завуча болх бергбола Пхьиленаькъан Хьасана Лида. Лакха говзал йола хьехархой ба МагӀалбикерча филиале болх бергбараш а.

Шо-шоай отделенега хьежжа хургья кагирхоша дешаш йоаккха ха. Ийс класс яьккхача а цхьайтта яьккхача а отта йиш цига деша. Ийс класс яьккхарий 3 шераи 9 беттаи деша деза, цхьайтта класс яьккхараш дешаш хургба 2 шераи 10 беттаи. Коммерчески кӀийле йолаш да цигара дешар, вешта аьлча, мах тела безаш. Масала, медйижарий дешар дешачар шера 55 эзар сом дала деза. Кхы а ши отделени я из мах тела безаш. Кхыча лостамех деша оттараша 45 эзар сом тела деза. Бакъда дешархо бо дале, цунна дикка гӀойле хургйолча тайпара оттабу мах. ХӀаране вахара хьалашка, таронашка хьежжа леладу укхаза из гӀулакх.

Балха говзалаш Ӏомае ловш, каьхаташ хьачуденнарашта юкъе ба гӀалий тӀа, юрта баха кхувшбоагӀараш. Царна юкъе ба Сурхо тӀара, ТӀой-Юртара, Ӏаьлий-Юртара, Пхьилекъонгий-Юртара, кхычахьара. Цу тайпарча дешарашта тӀакхувраш, хьалха дукхагӀа йиӀигаш хулар. ХӀанз уж а вожаш а цхьатарра ба, ала мегаргда. Цхьа хӀама да колледжа аьттув хулийташ. Наьсарера кхозза вӀаштӀардаь цун цӀа Тухана ИбрахӀима ший доалахьа да, цудухьа цох ахча тела дезаш бац уж. Цхьаькха цхьа лоархӀаме моттиг а я, атта тӀава аьттув болаш моттиг я колледж хьайийллар.

Наьсарерча пенсионни фонда духхьал доаллача цӀагӀа я из, цига автобусашца, «газелашца» тӀаваха йиш я. Вай къаман беркат хьадаргдола, хьаьнала къахьегамхой кхувлба цун тхов кӀалха.