Иштта хилар Ахьмад духхьашха сона вовзар. ДӀахо дӀайодача хана, цун вахарах, кхолламах дукхагӀа довза гӀийртав со, низ кхоачача тайпара. ТӀехьагӀо сона хайра из журналист волга, цо «Грозненски болхло» яхача газета редакце къахьийгалга. Цу заман чухь геттара хала дар вай къамах волча сага цу газета редакце балха ваха, дӀаэцаш хиннабац цига гӀалгӀай, «Сердало» газет да шун, цига дӀагӀо, оалаш хиннад. ХӀаьта а хинна-м хиннаб цу редакце къахьегаш вай къаман викалаш: Гадаборшакъонгий Осман, Озанаькъан Мурад, Мазенаькъан Микаил. ДӀахо дӀайодача хана Ахьмад Москве вахаш а, радио болх беш а хиннав. Цул совгӀа, «Журналист» яхача журналаца гӀулакх доагӀаш а хиннав Шимоахий Ахьмад. Тахан мо дагадоагӀа сона, СССР йолча заман чухь мехка дӀакхайкаяьяр республикай, областий газеташта юкъера яхь. Лакхе хьоахадаь журнал дар из дӀакхайкаяьр. Со цу хана «Сердало» газета редакце балха вар, 1982-гӀа шу дар мотташ ва-кх со из. Керттерча редактора Тебой Ӏабазбика Тухана, редакце болхлой ше волча хьагулбелча, аьлар: «Яхье дакъа лаца а газета дикагӀйола массехк номер Москве хьалъяхьийта а еза вай. Малсаганаькъан Ахьмад ва «Журналист» яхача журнала дӀакхайкаяьча цу яхьан жюрена юкъе. Цо а хьаллаца мег вай оагӀув...»

Газета номераш хоржаш, хьалйохьийташ къахьийгар мала вар сона ханзар, бакъда массехк бутт баьлча редакце дика хоам кхаьчар, «Сердало» газет столице хиннача яхье белгалдаьккхад, дикагӀчарех цаӀ санна. Грамота а яр мотташ ва со, редакцена енна. Шимоахий Ахьмада а ший дош аьнначох тара дар, къаман газет хоастадеш.

Журналист хинна ца Ӏеш, дика йоазонхо а вар Малсаганаькъан Ахьмад. Тайп-тайпарча шерашка бе-бе чулоацам бола доккха а зӀамига а книжкаш арадаьхад цо, вай къам берригача мехка дӀадовзийташ. «ГӀалгӀай 100 йоазанхо» яхача ший книжка тӀа журналиста, йоазанхочо, политолога Патанаькъан Йоакъапа яздаьд: «...Цун къоалама кӀалхара арадаьннача книжкашта кепа техай Шолжа-ГӀалий тӀа, Нальчике, Алма-Ате, Москве, Киеве; цхьаннена тӀехьа цхьаькха йоалаш, араяьннай цун «Даим хало ловш вола саг», «Эльбруса тӀара седкъа», «Лорс афиша еш воалл», «Вайнаьха мохк — Нохч-ГӀалгӀайче», «Бекхам», «Нах кхоаба Тирк», «Наькъахо тӀаэца никъ», «Лоамарой эзделах дола дувцараш» яха повесташи романаши...»

Къаьстта белгалдаккха безам ба са наьсархошта цо хетадаь «Даим хало ловш вола саг» яха роман. Цох ала мегаргда, гӀалгӀай болхлой класс хьахиларах да из. Йоазанхочо ювцар я Ӏоахарганаькъан ГӀапура цӀерагӀа хинна «Электроинструмент» яха завод. Къахьегамхой пхьоаллен вахар мишта хиннад, цига хьадаь бурош мел лоархӀаш, дерригача дунено къердаш хиннад, малаш хиннаб дикагӀбола болхлой, инженераш, кулгалхой, мишта хиннад завода юкъара вахар — шедар цу тӀара довза, деша йиш я.

Школашта лаьрхӀача книжкаш тӀа 1-9 классашка вай мехкахочо даьча йоазонех цхьаккха Ӏомадеш дац карарча хана. Из нийса дац аьнна хет сона. Цо кхелла йоазош пайдане хургдар кхувш йоагӀача тӀехьенна, нийса яха а хьаьнала къахьега а из Ӏомаеш.