Вахара бувзамашка гӀолла цо белагалдир, ГӀалгӀайчен хьалхара профсоюзаш 1924 шера хьакхелла хилар, цу хана республика хӀетта мара дӀаболабеш хиннаяц вахара-экономически дегӀаахара никъ. Цо белагалдир, цу хана профсоюзаш къахьегамхой га доаккхаш яр, царна лерттӀа къахьегама хьалаш хилийта, болхлочун, цун дезала хьашташ кхоачашде гӀерташ.

«Хувцамий ханаш йолча шерашка, профсоюзаш дика дакъа лоацаш яр промышленни гӀишлош, юртбоахам дегӀабоалабеча. Сийлахь-боккха Даьймехка тӀом лаьттача шерашка, ГӀалгӀайчен къахьегамхоша дика дакъа юкъедихьар Котало йоаккхаш: дуккхабараш тӀем тӀа бахар, юхебисараш даим къахьегаш бар», - аьлар Келаматанаькъан Махьмуд-Ӏаьлас.

Мехка Кулгалхочо белагалдир, вай къаман вахаре хала ена ха яр 1944 шу. Цо аьлар, цунга хьежжа доацаш, профсоюзий къахьегамхоша шоай болх дӀахохьош бар, наха новкъостал а деш; шоаш а дерригача къаманца цхьана мехкахбаьха хиннабале а.

«1957 шера, юха мехкадаьнначул тӀехьагӀа, доккха дакъа лаьцар профсоюзаша вахара-экономически хьал дегӀадоаладеча. ХӀаьта 1990 шера, ГӀалгӀай Республика хьакхеллача хана, профсоюзаша юха а новкъостал дир наха, цар балха моттигаш лораеш, иштта лоархӀаме декхараш кхоачашдеш», - аьлар мехка кулгалхочо.

Тахан, Махьмуд-Ӏаьлас яхачох, профсоюзаш дика дакъа лоацаш я юкъарча балха. Цар лораду къахьегамхой вахара хьалаш, цар хьашташ кхоачашдара тӀехьа къахьег, цар иштта хьаллоац вай кагирхой, ветеранаш, иштта дакъа лоац социальни программашка. Къаьстта лоархӀаме дар цар новкъостал, коронавирус оала лазар мехка денача хана, цар даим новкъостал дора лорашта, шоаш а чоалханерча хьалашка нийслуш бар аьнна доацаш.

«Дег чура баркал оал аз берригача ветеранашта, активисташта, профсоюзий доакъашхошта иштта цар дика къахьегарах! Могаш, ираз долаш хилда шо», - язду Келаматанаькъан Махьмуд-Ӏаьлас.