ГӀалгӀайче дӀайолаелар тиша каьхат гулдара «КӀалхарвакхха Грут» яха проект
Лайчилла бетта 5-ча денгара 18-ча денга кхаччалца, «КӀалхарваккха Грут» яха тиша каьхат гулдара экологически проект дӀахьоргья, из «Кагирхошта бола мохк» яха программа кхоачашъеш дӀахьош я, ГӀалгӀай Республикан Ӏалама тароний, экологе Министерствос хьал а лоацаш, яхаш, дийцар цигарча зарбан болх лелабераша.
72 ишкола дешархой яхьебаргба, ялх даькъа бекъабенна. Хьалха болх бе дӀайолалу 12 ишкол, цига деша дагӀа 8700 бер.
Уж я Наьсарен №4 йола юкъера ишкол, Наьсар шахьара №5 йола юкъера ишкол, Наьсарен №6 йола юкъера ишкол, Наьсарен-Шахьара №7 йола юкъера ишкол (Дошалкъа-Юрт), Наьсарен-Шахьара №8 йола юкъера ишкол (Аьлтий-Юрт), Наьсарен-Шахьара №10 йола юкъера ишкол, Наьсарен-Шахьара №12 йола юкъера ишкол, Наьсаен-Шахьара №17 йола керда дешара ишкол (Наьсар-Керте), Наьсарен-Шахьара №19 йола юкъера ишкол, Магасера №1 йола юкъера ишкол, Магас-Шахьара «Марем» оала гимнази, ГӀазе-Коара юкъера ишкол.
Деррига гулдаь каьхат дӀачулургда юха чакхдаккха. ХӀаьта ишколаш шин даькъах латтача яхьашка яргья: «Эггара дикагӀа толам баьккха ишкол»: ДукхагӀа каьхат гулдаь ишкола я, цунна 30 эзар сом мах бола видеопроектор лургья; «Эггара хьинар долаш вола дешархо»: 12 ишкола юкъера белгалвергва хьинар долаш къахьийга дешархо, цунна лургья грамота, иштта цун таро хургья ша биллача арена тӀа ваха (хохквалара долча билета чудоагӀаш да чам бола даар: бургер, кхерза коартол, соус, газировка)», - йоах экологаша хьабайтача хоамо.
